miinaa-e-mai ke saamne

bahār kī havā.eñ aa.iiñ sharq se

chalī ga.iiñ guzar ga.iiñ ki tez-tar thiiñ barq se

magar vo aise dhuñdle dhuñdle bulbuloñ ko chhoḌ kar chalī ga.ī haiñ sāġhar-e-sharāb meñ

ki farq koī bhī nahīñ hai un meñ aur hubāb meñ

guloñ kī ek ek kar ke pattiyāñ

ravāñ haiñ farsh-e-ḳhāk kī taraf chamāñ-chamāñ

tū ai hasīn nāznīñ

ki jis kā chehra hai gulāb-gūñ

sharāb ke asar se jis kī surḳhiyāñ huiiñ fuzūñ

batā ki sabza-zār meñ

daraḳht jo uge hue haiñ kab talak raheñge vo bahār meñ

qarār ik fareb hai har ik nigāh ke liye

bahut hī jald lamhe ā.eñge yahīñ

ki hogī hājat aadmī ko ik 'asā kī qat'-e-rāh ke liye

har ek samt nuur hai

uTho aur aao ek raqs ek vajd-o-josh meñ

shabāb kī hai dil meñ ab umang ik surūr hai

ye jab samāñ chalā gayā

nahīñ phir is se fā.eda

ki aa.e apne sar ko dekh kar safed hosh meñ

bahaar ki hawaen aain sharq se

chali gain guzar gain ki tez-tar thin barq se

magar wo aise dhundle dhundle bulbulon ko chhoD kar chali gai hain saghar-e-sharab mein

ki farq koi bhi nahin hai un mein aur hubab mein

gulon ki ek ek kar ke pattiyan

rawan hain farsh-e-KHak ki taraf chaman-chaman

tu ai hasin naznin

ki jis ka chehra hai gulab-gun

sharab ke asar se jis ki surKHiyan huin fuzun

bata ki sabza-zar mein

daraKHt jo uge hue hain kab talak rahenge wo bahaar mein

qarar ek fareb hai har ek nigah ke liye

bahut hi jald lamhe aaenge yahin

ki hogi hajat aadmi ko ek 'asa ki qat'-e-rah ke liye

har ek samt nur hai

uTho aur aao ek raqs ek wajd-o-josh mein

shabab ki hai dil mein ab umang ek surur hai

ye jab saman chala gaya

nahin phir is se faeda

ki aae apne sar ko dekh kar safed hosh mein