main KHak ho raha hun yahan KHak-dan mein

maiñ ḳhaak ho rahā huuñ yahāñ ḳhāk-dān meñ

vo rañg bhar rahā hai udhar āsmān meñ

ye kaun boltā hai mire dil ke andarūñ

āvāz kis kī gūñjtī hai is makān meñ

phir yuuñ huā ki zamzama-pardāz ho ga.ī

vo andalīb aur kisī gulsitān meñ

uḌtī hai ḳhaak dil ke darīchoñ ke ās-pās

shāyad makīn koī nahīñ is makān meñ

yūñhī nahīñ rukā thā zarā der ko safar

dīvār aa ga.ī thī koī darmiyān meñ

ik ḳhvāb kī talāsh meñ niklā huā vajūd

shāyad pahuñch chukā hai kisī dāstān meñ

'ahmad' tarāshtā huuñ kahīñ baad meñ use

tasvīr dekh letā huuñ pahle chaTān meñ

main KHak ho raha hun yahan KHak-dan mein

wo rang bhar raha hai udhar aasman mein

ye kaun bolta hai mere dil ke andarun

aawaz kis ki gunjti hai is makan mein

phir yun hua ki zamzama-pardaz ho gai

wo andalib aur kisi gulsitan mein

uDti hai KHak dil ke darichon ke aas-pas

shayad makin koi nahin is makan mein

yunhi nahin ruka tha zara der ko safar

diwar aa gai thi koi darmiyan mein

ek KHwab ki talash mein nikla hua wajud

shayad pahunch chuka hai kisi dastan mein

'ahmad' tarashta hun kahin baad mein use

taswir dekh leta hun pahle chaTan mein