achchha tumhaare shahr ka dastur ho gaya

achchhā tumhāre shahr kā dastūr ho gayā

jis ko gale lagā liyā vo duur ho gayā

kāġhaz meñ dab ke mar ga.e kiiḌe kitāb ke

dīvāna be-paḌhe-likhe mash.hūr ho gayā

mahloñ meñ ham ne kitne sitāre sajā diye

lekin zamīñ se chāñd bahut duur ho gayā

tanhā.iyoñ ne toḌ dī ham donoñ kī anaa!

ā.īna baat karne pe majbūr ho gayā

daadī se kahnā us kī kahānī sunā.iye

jo bādshāh ishq meñ mazdūr ho gayā

sub.h-e-visāl pūchh rahī hai ajab savāl

vo paas aa gayā ki bahut duur ho gayā

kuchh phal zarūr ā.eñge roTī ke peḌ meñ

jis din mirā mutālba manzūr ho gayā

achchha tumhaare shahr ka dastur ho gaya

jis ko gale laga liya wo dur ho gaya

kaghaz mein dab ke mar gae kiDe kitab ke

diwana be-paDhe-likhe mashhur ho gaya

mahlon mein hum ne kitne sitare saja diye

lekin zamin se chand bahut dur ho gaya

tanhaiyon ne toD di hum donon ki ana!

aaina baat karne pe majbur ho gaya

dadi se kahna us ki kahani sunaiye

jo baadshah ishq mein mazdur ho gaya

subh-e-visal puchh rahi hai ajab sawal

wo pas aa gaya ki bahut dur ho gaya

kuchh phal zarur aaenge roTi ke peD mein

jis din mera mutalba manzur ho gaya