be-taqati ne dil ki giraftar kar diya
be-tāqatī ne dil kī giraftār kar diyā
andoh-o-dard-e-ishq ne bīmār kar diyā
darvāze par khaḌā huuñ ka.ī din se yaar ke
hairat ne husn kī mujhe dīvār kar diyā
saa.e ko us ke dekh ke vahshat balā huī
dīvāna mujh ko jaise parī-dār kar diyā
nisbat huī gunāhoñ kī az-bas mirī taraf
be-jurm un ne mujh ko gunahgār kar diyā
din-rāt us ko DhūñDe hai dil shauq ne mujhe
nāyāb kis guhar kā talabgār kar diyā
duur us se zaar zaar jo rotā rahā huuñ maiñ
logoñ ko merī zaarī ne be-zār kar diyā
ḳhūbī se baḳht-e-bad kī use ishq se mire
yāroñ ne rafta-rafta ḳhabar-dār kar diyā
jis ke lagā.ī jī meñ na us ke havas rahī
ya.anī ki ek vaar hī meñ paar kar diyā
pahlū meñ dil ne lauT ke ātish se shauq kī
pāyān-e-kār āñkhoñ ko ḳhūñ-bār kar diyā
kyā jānūñ ishq jaan se kyā chāhtā hai 'mīr'
ḳhūñ-rezī kā mujhe to sazā-vār kar diyā
be-taqati ne dil ki giraftar kar diya
andoh-o-dard-e-ishq ne bimar kar diya
darwaze par khaDa hun kai din se yar ke
hairat ne husn ki mujhe diwar kar diya
sae ko us ke dekh ke wahshat bala hui
diwana mujh ko jaise pari-dar kar diya
nisbat hui gunahon ki az-bas meri taraf
be-jurm un ne mujh ko gunahgar kar diya
din-raat us ko DhunDe hai dil shauq ne mujhe
nayab kis guhar ka talabgar kar diya
dur us se zar zar jo rota raha hun main
logon ko meri zari ne be-zar kar diya
KHubi se baKHt-e-bad ki use ishq se mere
yaron ne rafta-rafta KHabar-dar kar diya
jis ke lagai ji mein na us ke hawas rahi
yani ki ek war hi mein par kar diya
pahlu mein dil ne lauT ke aatish se shauq ki
payan-e-kar aankhon ko KHun-bar kar diya
kya jaanun ishq jaan se kya chahta hai 'mir'
KHun-rezi ka mujhe to saza-war kar diya
- Book : MIRIYAAT - Diwan No- 6, Ghazal No- 1786
Additional information available
Click on the INTERESTING button to view additional information associated with this sher.
About this sher
Lorem ipsum dolor sit amet, consectetur adipiscing elit. Morbi volutpat porttitor tortor, varius dignissim.
rare Unpublished content
This ghazal contains ashaar not published in the public domain. These are marked by a red line on the left.