وقت ہر زخم کا مرہم تو نہیں بن سکتا

درد کچھ ہوتے ہیں تا عمر رلانے والے

بڑا گھاٹے کا سودا ہے صداؔ یہ سانس لینا بھی

بڑھے ہے عمر جیوں جیوں زندگی کم ہوتی جاتی ہے

بجھ گئی شمع کی لو تیرے دوپٹے سے تو کیا

اپنی مسکان سے محفل کو منور کر دے

اپنی اردو تو محبت کی زباں تھی پیارے

اف سیاست نے اسے جوڑ دیا مذہب سے

اب کہاں دوست ملیں ساتھ نبھانے والے

سب نے سیکھے ہیں اب آداب زمانے والے

دے گیا خوب سزا مجھ کو کوئی کر کے معاف

سر جھکا ایسے کہ تا عمر اٹھایا نہ گیا

محبت کے مریضوں کا مداوا ہے ذرا مشکل

اترتا ہے صداؔ ان کا بخار آہستہ آہستہ

وقت کے ساتھ صداؔ بدلے تعلق کتنے

تب گلے ملتے تھے اب ہاتھ ملایا نہ گیا

کیوں سدا پہنے وہ تیرا ہی پسندیدہ لباس

کچھ تو موسم کے مطابق بھی سنورنا ہے اسے

بڑے باوفا تھے مرے یار سب

مصیبت میں جب تک پکارا نہ تھا

ذکر میرا آئے گا محفل میں جب جب دوستو

رو پڑیں گے یاد کر کے یار سب یاری مری

رسم دنیا تو کسی طور نبھاتے جاؤ

دل نہیں ملتے بھی تو ہاتھ ملاتے جاؤ

دل جلاؤ یا دیئے آنکھوں کے دروازے پر

وقت سے پہلے تو آتے نہیں آنے والے

اک نہ اک روز رفاقت میں بدل جائے گی

دشمنی کو بھی سلیقے سے نبھاتے جاؤ

تم ستاروں کے بھروسے پہ نہ بیٹھے رہنا

اپنی تدبیر سے تقدیر بناتے جاؤ

بھلے ہی لاکھ حوالوں کے ساتھ کہتے ہیں

مگر وہ صرف کتابوں کی بات کہتے ہیں

دل کو سمجھا لیں ابھی سے تو مناسب ہوگا

اک نہ اک روز تو وعدے سے مکرنا ہے اسے

چلو کہ ہم بھی زمانے کے ساتھ چلتے ہیں

نہیں بدلتا زمانہ تو ہم بدلتے ہیں

نہ ذکر گل کا کہیں ہے نہ ماہتاب کا ہے

تمام شہر میں چرچا ترے شباب کا ہے

صداؔ کے پاس ہے دنیا کا تجربہ واعظ

تمہاری بات میں بس فلسفہ کتاب کا ہے

اجالا علم کا پھیلا تو ہے چاروں طرف یارو

بصیرت آدمی کی کچھ مگر کم ہوتی جاتی ہے

وہ تو خوشبو ہے ہر اک سمت بکھرنا ہے اسے

دل کو کیوں ضد ہے کہ آغوش میں بھرنا ہے اسے

کون آئے گا بھول کر رستہ

دل کو کیوں ضد ہے گھر سجانے کی

چوم لوں میں ورق ورق اس کا

تیرے چہرے سے جو کتاب ملے

انہیں نہ تولیے تہذیب کے ترازو میں

گھروں میں ان کے نہ چولھے نہ دیپ جلتے ہیں

ہمیں نہ راس زمانے کی محفلیں آئی

چلو کہ چھوڑ کے اب اس جہاں کو چلتے ہیں

موت کی گود میں جب تک نہیں تو سو جاتا

تو صداؔ چین سے ہرگز نہیں سونے والا

لوگ کہتے ہیں دل لگانا جسے

روگ وہ بھی لگا کے دیکھ لیا

چمن میں خشک سالی پر ہے خوش صیاد کہ اب خود

پرندے پیٹ کی خاطر اسیر دام ہوتے ہیں

مر مر کے جئیں کس لیے بندے ترے مولیٰ

جینا بھی ذرا موت سا آسان بنا دے

اشک آنکھوں سے مری نکلے مسلسل لیکن

اس نے اک حرف تسلی نہ نکالا لب سے

جنہیں ہم بلبلا پانی کا دکھتے ہیں کہو ان سے

نظر ہو دیکھنے والی تو بحر بے کراں ہم ہیں

ڈھونڈ افلاک نئے اور زمینیں بھی نئی

ہو غزل کا تری ہر شعر نیا حرف بہ حرف

اپنی آنکھوں کی بد نصیبی ہائے

اک نہ اک روز حادثہ دیکھا

کتنا سوچا تھا دل لگائیں گے

سوچتے سوچتے حیات ہوئی

چھین لینا یا خدا مجھ سے مرے لوح و قلم

گر زوال آئے مرے اشعار کے معیار میں

شعر میں ساتھ روانی کے معانی بھی تو بھر

اے صداؔ قید تو کوزے میں سمندر کر دے