حضرت شاہ ولی اللہ محدث دہلوی اپنے عہد کے قطب شمار کیے جاتے ہیں۔ انہوں نے برصغیر ہندوستان میں رشد وہدایت کے وہ شمع روشن کیے جس کی لو کبھی نہیں بجھ سکتی۔ یوں تو ان کے ہم عصروں میں کئی اور بڑے نام آتے ہیں جن کا اندازہ ان کے مکتوبات کے مطالعے سے ہوتا ہے۔ انہوں نے موقع بہ موقع بزرگان دین اور صوفیائے کرام کو جو مکتوبات لکھے، زیر نظر کتاب ’ مکتوبات فارسی مع ترجمہ اردو‘ میں انہیں جمع کیا گیا ہے۔ اس کے علاوہ کتاب میں حضرت عارف باللہ شاہ ولی اللہ کی زندگی کے حوالے سے بھی بہت ساری اطلاعات فراہم کی گئی ہیں۔

شاہ ولی اللہ محدث دہلوی برصغیر کے نامور عالم دین گزرے ہیں۔ شاہ ولی اللہ 21 فروری 1703ء کو مظفرنگر بھارت میں ہیدا ہوئے اور 20 اگست 1762ء کو دہلی میں وفات پائی۔ شاہ ولی اللہ ہند و پاک کے نامور عالم دین، الہیات داں، فلسفی اور محدث گزرے ہیں۔ انہوں نے سات سال کی عمر میں قرآن حافظ کیا۔ ان کے والد شاہ عبدالرحیم محدث دہلوی بھی اپنے عہد کے مایہ ناز محدث تھے۔ انہیں سے اکتساب فیض کیا اور بیعت و خلافت بھی پائی۔ شاہ ولی اللہ نقشبندیہ ابوالعلائیہ کی پیروی کیا کرتے تھے۔ شاہ ولی اللہ محدث دہلوی نے قرآن پاک کا فارسی میں ترجمہ بھی کیا ہے۔ اس کے علاوہ علم تفسیر، علم حدیث، علم فقہ، علم تاریخ اور تصوف پر بھی کتابیں لکھیں مگر ان کو شہرت ان کی کتاب حجۃ اللہ البالغہ سے ملی۔ شاہ ولی اللہ نے بحیثیت داعی بھی بڑے بڑے کارنامے انجام دیئے۔ سماج کی برائیوں کو دور کیا اور معاشرے میں پھیلنے والی غلط فہمیوں کو حکمت و دانائی سے ختم کیا۔