مصنف نے جدید مواصلاتی انقلاب اور ذرائع ابلاغ کی ترقی پر تحقیقی مقالہ تیار کیا اور اسے کتابی شکل دے کر ایک انقلابی کام انجام دیا ہے۔ اس بات سے انکار نہیں کیا جا سکتا ہے کہ جدید ذرائع ابلاغ کے مطالعے کے لئے اردو میں مواد بہت کم دستیاب ہیں۔ اس کمی کو اس کتاب کے ذریعہ دور کرنے کی سعی ہوئی ہے تاکہ برقیاتی ذرائع ابلاغ کے متلاشیوں کو مطالعے کا مواد اردو زبان میں ایک جگہ دستیاب ہو جائے۔ کتاب پانچ ابواب پر مشتمل ہے۔ پہلے باب میں ریڈیو کے پیش رو کے علاوہ ذیلی عنوان کے تحت متعدد متعلقہ موضوعات پر بات ہوئی ہے۔ دوسرے باب میں ریڈیو آفاقی صدا کے تحت متعدد موضوعات لئے گئے ہیں ۔ تیسرا باب فلم مسحور کن دنیا، چوتھا باب ٹیلی ویژن اور پانچواں انٹرنیٹ کے حوالے سے ہے اور ہر باب میں ذیلی عنوان کے تحت متعدد پہلوؤں پر شاندار، محققانہ کلام ہوا ہے۔ کتاب الکٹرونک میڈیا سے متعلق تمام معروف چیزوں پر اور اس کے مختلف گوشوں پر بنیادی معلومات کی دستیابی کے ساتھ ہی اس شعبے میں ماضی قریب میں ہوئی پیش رفت کو شامل کیا گیا ہے تاکہ عام قاری کے ساتھ ساتھ الکٹرونک میڈیا کے طالب علموں کے لئے بھی یہ کتاب مفید اور معاون ثابت ہو۔