پیش نظر بانی کا شعری انتخاب" حرف معتبر" ہے۔ یہ انتخاب چندر پرکا شاد نے انجام دیا ہے۔ جبکہ مہدی حیدر زیدی نے اس کو مرتب کیا ہے۔ جس میں غزلیں اور نظمیں دونوں شامل ہیں۔ راجیندر منچندہ بانی کی آوازاپنے منفرد لہجہ اور منفرد موضوعات کے ساتھ نمایاں ہے۔ بانی کے کلام سے متعلق راج نارائن راز رقم طراز ہیں۔"بانی کی غزل ایک ایسی دنیا کا دروازہ ہم پر وا کرتی ہے جو بڑی حد تک ہماری دیکھی بھالی ہے۔جو بن ،بگڑ اور بدل رہی ہے،جو رو میں ہے ،رواداری میں ہے ، جو طلبگار ہے ،دیندار نہیں، جس میں متاع جاں کو محفوظ رکھنا ہی بڑی بات ہے۔بانی کی غزلوں میں سانس لینے والے معاشرے کا فرد مذبذب ہے۔ تشکیک میں مبتلا ہے۔"بانی کی غزلیں ایک ایسے فرد کی دلی کیفیات کی عکاسی کرتی ہے جو پختہ ،عزائم سے بھرپور اور جہاں دیدہ ہے۔جو اپنی منزل تک پہنچنے کے لیے اپنے راہ کی روکاوٹوں کو دور کرنے پر یقین رکھتا ہے۔بانی کے یہاں موضوعات کا تنوع تو ہے ہی لیکن ان کامنفرد اسلوب انھیں معاصرین شعرا میں منفرد اور معتبر بنانے میں معاون ہے۔