"مجالس رنگین" سعادت یار خان رنگین کی لکھی ہوئی نہایت ہی اہم کتاب ہے۔ چونکہ رنگین ایک سیاح مزاج انسان تھے، انہوں نے مختلف شہروں کی سیر کی تھی، جہاں ہر قسم کے لوگوں سے ملاقاتیں ہوئیں تھیں جن میں شعرا بھی شامل تھے۔ "مجالس رنگین" میں انہیں شعرا کی مجالس اور صحبتوں کا بیان ہے۔ رنگین کو جہاں کہیں دو چار سخن فہم مل گئے اس قسم کی بے تکلف مجلسیں شروع ہوجاتی تھیں۔ ان میں اساتذہ اور نو مشق شعرا سبھی شامل ہوتے ہیں، فی البدیہ کلام کہتے تھے، مختلف صنائع و بدائع کے استعمال میں اپنی قدرت دکھاتے تھے، اساتذہ اور معاصرین کے کلام پر تنقید کی جاتی تھی گو کہ اس زمانہ میں صرف لفظی تنقید تھی۔ عام طور پر الفاظ کے انتخاب بندش اور قواعد عروض کی پابندی پر زیادہ زور دیا جاتا تھا۔ ان مجالس کے مطالعے سے اس عہد کے شاعرانہ مذاق اور تنقیدی معیار کا پورا اندازہ ہوجاتا ہے۔ زیر نظر نسخہ کو سید مسعود حسن رضوی ادیب نے مرتب کیا ہے۔ مرتب کا مقدمہ کافی اہمیت حامل ہے۔ کتاب کے آخر میں حواشی و تعلیقات ہیں جن سے اس نسخہ کی وقعت میں اضافہ ہوا ہے۔