۱۹۵۸ء تک آتے آتے اُردو ادب میں ترقی پسند تحریک کے اثرات تقریبا ختم ہوچکے تھے اور جدیدت نے ایک واضح سمت اختیار کرلی تھی انہی دنوں اُردو شاعری کے ایوان میں ایک نئی آواز کی گونج محمد علوی کی صورت میں سنائی دے رہی تھی ۔ جنہوں نے اپنا ایک انوکھا اسلوب اختیار کیا اور فارسی ترکیبات کو ترک کرکے عام بول چال کی زبان کو اپنی شاعری میں استعمال کیا۔ "محمد علوی ایک مطالعہ" , محمو علوی کی شاعری اور شخصیت پر لکھے خاکے ، مضامین، تجزیے، تاثرات،شعری نذرانوں اور ان کے انتخاب کا مجموعہ ہے ۔ جسے معروف شاعر کمار پاسی نے مرتب کیا ہے۔مرتب نےاس کتاب کی اشاعت کا مقصد جدید شاعری کی نئی سمت ظاہر کرنا بتایا ہے۔ بقول مرتب کتاب میں شامل مضامین نہ صرف محمد علوی کے شخصی اور شعری کردار کی علیحدہ شناخت کی نشاندہی کرتے ہیں بلکہ جدید اردو شاعری کو سمجھنے کے لیے ایک نئی سمت کا بھی تعین کرتے ہیں۔محمو علوی کی شخصیت اور شاعری کا مطالعہ کرنے کے لیے یہ کتاب بہت مفید ثابت ہوسکتی ہے۔