کچھ شاعر ایسے ہوتے ہیں جو ہمیشہ پردۂ خفا میں رہتے ہیں ، وہ بہت ہی کم سامنے آتے ہیں البتہ ان کا کلام عوام و خواص کے درمیان مقبول ہوتا ہے ۔ ان ہی میں سے پرنم الہ آبادی ہیں ۔ ’’بھردو جھولی میری یا محمد، لوٹ کر میں نہ جاؤں گا خالی‘‘ اس نعتیہ کلام سے کون واقف نہیں ہوگا ۔ موسیقی کے دلدادہ خواہ کسی بھی مذہب و مسلک کاہو ان کی پہلی پسند یہ نعت ہوتی ہے ۔ اس کے خالق پرنم الہ آبادی ہی ہیں ۔یہی نہیں بلکہ ’’اس شانِ کر م کا کیا کہنا ‘‘ فلم کچے دھاگے کا یہ مشہور نغمہ بھی پر نم کا ہے ۔ ایک مشہو ر حمد ’’ اللہ ہو اللہ ہو‘ ہے جو مذہبی جلسو ں و محفلوں میں بہت ہی زیادہ گائی جاتی ہے اسکو عارف لوہار نے ساری دنیا میں پیش کیا ۔ مذکورہ بالا کلام ایک نمونہ کے طور پر یہاں ذکر کیا جارہا ہے حالانکہ ان کے کئی کلام کو وقت کے مشہور غزل خواں اور قوالوں نے گایا ہے ۔ خواتین و مر د موسیقاروں نے ان کے کلام میں دلچسپی دکھائی ہے جس سے اندازہ لگایاجاسکتا ہے کہ انہوں نے اپنا میدان کس قسم کی شاعری کے لیے تیار کیاہے ۔ اس مجموعہ میں موجود کلام کا مطالعہ کرنے کے بعد قاری کو یہ احساس ہوجاتا ہے کہ اس میں ہر رنگ کی شاعر ی ہے ، جس میں رومانوی رنگ و آہنگ زیادہ نظرآتا ہے ۔ امیجری بھی غضب کی ہے کہیں کہیں قاری اس امیجری میں اپنے محبوب کا تصو ر کر نے لگتا ہے جس سے اندازہ لگاسکتے ہیں کہ موسیقاروں میں مقبولیت کی ایک بڑی وجہ یہ بھی ہے ۔