ڈاکٹر شفیق الرحمن کا شمار ترقی پسند افسانہ نگاروں میں ہوتا ہےکیونکہ آپ نے اپنی ادبی زندگی کا آغاز اس وقت کیا جب ترقی پسند تحریک اپنے شباب پر تھی ۔۱۹۴۱ء میں کرنیں کے عنوان سے پہلا افسانوی مجموعہ منظر عام پر آیا اور بہت جلد آپ نے مقوبلیت کی تمام منزلیں طے کرلیں۔شفیق الرحمٰن کے افسانوں کا خاص وصف یہی ہے کہ طرز اور اندازِ بیان سے ان کی شخصیت کا انکشاف ہوتا ہے۔ اس کے علاوہ ان کے افسانوں میں بہ یک وقت شوخی و ظرافت کے پہلو بھی نظر آتے ہیں تو رومان کی ہلکی پھلکی دنیا بھی دیکھی جاسکتی ہے ۔شفیق الرحمن نے اپنے افسانوں میں کسانوں اور مزدوروں پر بات کرنے کے بجائے اعلی متسوط گھرانوں کے موضوعات اور مسائل کو اپنے افسانوں کا موضوع بنایا ہے کیونکہ ان کا تعلق بھی ایسے ہی گھرانے سے تھا۔شگوفے شفیق الرحمٰن کا مقبول ترین افسانوی مجموعہ ہے جو ۱۹۴۳ء میں پہلی بار شائع ہوا۔اس مجموعے میں کل گیارہ افسانے ہیں۔شفیق الرحمٰن کے بیشتر افسانوں میں تین یا چار ہی کردار نظر آتے ہیں اور انہیں کے درمیان پوری کہانی گھومتی ہوئی نظر آتی ہے۔