ہر زبان کے لیے کچھ اصول اور قوانین ہوتے ہیں، جن سے اس زبان کو صحیح طور سے سیکھا اور استعمال کیا جا سکتا ہے۔ زبان کی درستی اور اس کی خوبصورتی کو برقرار رکھنے کے لیے ان قوانین پر عمل درآمد کرنا ضروری ہوتا ہے۔ اردو زبان کے بھی کچھ اصول ہیں جن کے جاننے سے اردو زبان کو ٹھیک طریقے سے بولا اور سمجھا جا سکتا ہے۔گرامر میں "صرف" قواعد کا وہ حصہ ہے جس میں جملوں اور مرکبات کی بجائے، فقط الفاظ کے بارے میں بحث کی جاتی ہے؛ اُن کی ساخت، بناوٹ اور معانى کی وضاحت کی جاتی ہے اور صرف الفاظ کو موضوع بحث بنایا جاتا ہے نَحو، قواعد کا وه حصہ ہے جس میں علٰیحده علٰیحده الفاظ کی بجائے الفاظ کے مجموعوں، مُرَکَّب جُملوں یا عِبارتوں سے بحث کی جاتی ہے۔ زیر نظر کتاب میں اردو کے انھیں قواعد و اصول کو بیان کیا گیاہے۔ کتاب کی خاص چیز یہ ہے کہ چونکہ اردو زبان ہندی نزاد ہے اس لیے اردو کے اصول کو اسی تناظر میں بیان کیا گیا ہے۔