خودنوشت میں مصنف اپنی ذات کو محور بنا کر اپنے عہد کے سماجی سیاسی اور معاشرتی حالات کو قلمبند کر تا ہے ۔ اس میں مصنف خود ہی مجرم، گواہ اور جج ہوتا ہے ۔ یہی وجہ ہے کہ خود نوشت سے قاری دیانت دار ی کی بہت ہی زیادہ توقع کرتا ہے ۔ اگر مصنف کسی حادثہ کو اپنے زاویہ سے دیکھتا ہے اور کسی دوسرے زاویہ کو مکمل طور پر درکنار کر جا تا ہے تو پھر وہ قاری کی عدالت میں ماخوذہوتا ہے ۔ سوانح عمریاں عموماً بڑے لوگوں کی پڑھی جاتی ہیں جن سے ایک طبقہ متاثر ہوتا ہے ، اس میں ان کے شیدائی ان کی بے پناہ جدو جہد یا پھر ان کی زندگی کے ان کہے واقعات سے روشنا س ہوناچاہتے ہیں ۔ خود نوشت پڑھنے کا رجحان اسلوب سے بھی ہے جیسے یادو ں کی بارات و دیگر ۔ اردو میں خود وشت کی عمر بہت ہی قلیل ہے بلکہ جب سے رواں نثر کی شروعات ہوتی ہے تب سے ہی اردو میں خودنوشت کا رجحان بھی ہوتا ہے۔ یہ کتاب پانچ ابواب پر مشتمل ہے ۔ پہلے باب میں خود نوشت کا فنی مفہوم اور خصوصیات کا ذکر ہے ۔ دوسرے میں عالمی ادب میں خودنوشت کی روایت پر گفتگو ہے ۔ تیسر ے میں اردو میں آپ بیتی کے جتنے بھی مختلف اظہا ر ہیں ان کو شمار کیاگیا ہے ۔ چوتھے باب میں اردو خود نوشت کی روایت اور فن پر گفتگو ہے ۔ خود نوشت پر ریسرچ کرنے والوں کے لیے یہ عمدہ اورمعاون کتاب ہوسکتی ہے ۔