ai mere ham-nashin chal kahin aur chal is chaman mein ab apna guzara nahin

ai mire ham-nashīñ chal kahīñ aur chal is chaman meñ ab apnā guzāra nahīñ

baat hotī guloñ tak to sah lete ham ab to kāñToñ pe bhī haq hamārā nahīñ

aaj aa.e ho tum kal chale jāoge ye mohabbat ko apnī gavāra nahīñ

umr bhar kā sahārā bano to bano do ghaḌī kā sahārā sahārā nahīñ

dī sadā daar par aur kabhī tuur par kis jagah maiñ ne tum ko pukārā nahīñ

Thokareñ yuuñ khilāne se kyā fā.eda saaf kah do ki milnā gavāra nahīñ

gulsitāñ ko lahū kī zarūrat paḌī sab se pahle hī gardan hamārī kaTī

phir bhī kahte haiñ mujh se ye ahl-e-chaman ye chaman hai hamārā tumhārā nahīñ

zālimo apnī qismat pe nāzāñ na ho daur badlegā ye vaqt kī baat hai

vo yaqīnan sunegā sadā.eñ mirī kyā tumhārā ḳhudā hai hamārā nahīñ

apnī zulfoñ ko ruḳh se haTā lījiye merā zauq-e-nazar aazmā lījiye

aaj ghar se chalā huuñ yahī soch kar yā to nazreñ nahīñ yā nazāra nahīñ

jaane kis kī lagan kis ke dhun meñ magan ham ko jaate hue muḌ ke dekhā nahīñ

ham ne āvāz par tum ko āvāz dī phir bhī kahte haiñ ham ne pukārā nahīñ

ai mere ham-nashin chal kahin aur chal is chaman mein ab apna guzara nahin

baat hoti gulon tak to sah lete hum ab to kanTon pe bhi haq hamara nahin

aaj aae ho tum kal chale jaoge ye mohabbat ko apni gawara nahin

umr bhar ka sahaara bano to bano do ghaDi ka sahaara sahaara nahin

di sada dar par aur kabhi tur par kis jagah main ne tum ko pukara nahin

Thokaren yun khilane se kya faeda saf kah do ki milna gawara nahin

gulsitan ko lahu ki zarurat paDi sab se pahle hi gardan hamari kaTi

phir bhi kahte hain mujh se ye ahl-e-chaman ye chaman hai hamara tumhaara nahin

zalimo apni qismat pe nazan na ho daur badlega ye waqt ki baat hai

wo yaqinan sunega sadaen meri kya tumhaara KHuda hai hamara nahin

apni zulfon ko ruKH se haTa lijiye mera zauq-e-nazar aazma lijiye

aaj ghar se chala hun yahi soch kar ya to nazren nahin ya nazara nahin

jaane kis ki lagan kis ke dhun mein magan hum ko jate hue muD ke dekha nahin

hum ne aawaz par tum ko aawaz di phir bhi kahte hain hum ne pukara nahin