ab intiha ka tere zikr mein asar aaya

ab intihā kā tire zikr meñ asar aayā

ki muñh se naam liyā dil meñ tū utar aayā

bahut dinoñ pe mirī chashm meñ nazar aayā

ai ashk ḳhair to hai tū kidhar kidhar aayā

hazār shukr ki is dil meñ tū nazar aayā

ye naqsha safha-e-ḳhālī pe jald utar aayā

bashar habāb kī sūrat hameñ nazar aayā

bharī jo qatre ke andar havā ubhar aayā

zabāñ pe aatā hai naala bhī sau karishmoñ se

kahāñ se aap ke andāz kā asar aayā

adam meñ aish hai chaltā huuñ maiñ bhī le ai dil

jahāñ meñ jitne musībat ke din the bhar aayā

likhe ko roiye ab ta-ba-hashr turbat meñ

ki mere marne pe ḳhat le ke nāma-bar aayā

paḌā hai shab se yuuñ hī ab talak na lī karvaT

dil-e-sitam-zada us kī galī se mar aayā

hazār shukr ḳhudā kā yahī ġhanīmat hai

na ḳhair aayā mire dil ko aur shar aayā

riyā to dil meñ thī māthe pe ab hai us kā nishāñ

kahāñ kā daaġh kahāñ daf.atan ubhar aayā

muqīm-e-dil hai Dañvāñ Dol rah ke ab īmāñ

butoñ ke qahr se chhūTā ḳhudā ke ghar aayā

hamāre pā-e-talab ne baḌī muhim sar kī

ki kaT ke sāmne qātil ke apnā sar aayā

sharāb pī ke maiñ pahuñchā falak pe ai saaqī

kahāñ se un ka.ī qatroñ meñ ye asar aayā

vo chāhe bad kahe qāsid butoñ ko yā mujh ko

haram meñ chain se īmān jā ke dhar aayā

lahad meñ shāna hilā kar ye maut kahtī hai

le ab to chauñk musāfir ki apne ghar aayā

hazār shukr huā āftāb-e-hashr tulū

baḌī to laaj rahī ye ki tū nazar aayā

gavāhiyāñ huiiñ aazā kī hashr meñ maqbūl

vo paak ho ga.e ilzām mere sar aayā

hujūm-e-ġham ne sikhāne kī laakh koshish kī

hameñ to aah bhī karnā na umr bhar aayā

jo chand din meñ hue zī-kamāl kaun haiñ 'shād'

hameñ to sher kā kahnā na umr bhar aayā

usī ko sher samajhte haiñ 'shād' ahl-e-mazāq

udhar paḌhā ki diloñ meñ idhar utar aayā

ab intiha ka tere zikr mein asar aaya

ki munh se nam liya dil mein tu utar aaya

bahut dinon pe meri chashm mein nazar aaya

ai ashk KHair to hai tu kidhar kidhar aaya

hazar shukr ki is dil mein tu nazar aaya

ye naqsha safha-e-KHali pe jald utar aaya

bashar habab ki surat hamein nazar aaya

bhari jo qatre ke andar hawa ubhar aaya

zaban pe aata hai nala bhi sau karishmon se

kahan se aap ke andaz ka asar aaya

adam mein aish hai chalta hun main bhi le ai dil

jahan mein jitne musibat ke din the bhar aaya

likhe ko roiye ab ta-ba-hashr turbat mein

ki mere marne pe KHat le ke nama-bar aaya

paDa hai shab se yun hi ab talak na li karwaT

dil-e-sitam-zada us ki gali se mar aaya

hazar shukr KHuda ka yahi ghanimat hai

na KHair aaya mere dil ko aur shar aaya

riya to dil mein thi mathe pe ab hai us ka nishan

kahan ka dagh kahan dafatan ubhar aaya

muqim-e-dil hai Danwan Dol rah ke ab iman

buton ke qahr se chhuTa KHuda ke ghar aaya

hamare pa-e-talab ne baDi muhim sar ki

ki kaT ke samne qatil ke apna sar aaya

sharab pi ke main pahuncha falak pe ai saqi

kahan se un kai qatron mein ye asar aaya

wo chahe bad kahe qasid buton ko ya mujh ko

haram mein chain se iman ja ke dhar aaya

lahad mein shana hila kar ye maut kahti hai

le ab to chaunk musafir ki apne ghar aaya

hazar shukr hua aaftab-e-hashr tulu

baDi to laj rahi ye ki tu nazar aaya

gawahiyan huin aaza ki hashr mein maqbul

wo pak ho gae ilzam mere sar aaya

hujum-e-gham ne sikhane ki lakh koshish ki

hamein to aah bhi karna na umr bhar aaya

jo chand din mein hue zi-kamal kaun hain 'shad'

hamein to sher ka kahna na umr bhar aaya

usi ko sher samajhte hain 'shad' ahl-e-mazaq

udhar paDha ki dilon mein idhar utar aaya