adu kambaKHt ko sauda hai kuchh aisa judai ka

adū kambaḳht ko saudā hai kuchh aisā judā.ī kā

liye sar par phirā kartā hai Dhāñcha chārpā.ī kā

kabhī tum mujh ko dhar paTko kabhī maiñ tum ko de mārūñ

mazā us vaqt hai ai jān-e-jāñ is hāthā-pā.ī kā

ye kyā paḌh paḌh ke dam karte ho chupke se hasīnoñ par

uThā hī chāhtā hai shaiḳh parda pārsā.ī kā

sar-e-mahfil raqīb-e-rū-siyah kā Tetvā pakḌā

machāyā shor buzdil ne duhā.ī kā tihā.ī kā

tumheñ jab maiñ ne dhar DapTā to koī bhī nahīñ bolā

bahut hī dam bharā karte the aadā āshnā.ī kā

maiñ dil par choT khā.ūñ un parī-rūoñ ke hāthoñ se

mujhe nusḳha agar koī batā de momyā.ī kā

sar-e-mahfil har ik se be-jhijhak āñkheñ laḌātā hai

uThāyā hai but-e-pur-fan ne kyā beḌā DhiTā.ī kā

adu kambaKHt ko sauda hai kuchh aisa judai ka

liye sar par phira karta hai Dhancha chaarpai ka

kabhi tum mujh ko dhar paTko kabhi main tum ko de marun

maza us waqt hai ai jaan-e-jaan is hatha-pai ka

ye kya paDh paDh ke dam karte ho chupke se hasinon par

uTha hi chahta hai shaiKH parda parsai ka

sar-e-mahfil raqib-e-ru-siyah ka Tetwa pakDa

machaya shor buzdil ne duhai ka tihai ka

tumhein jab main ne dhar DapTa to koi bhi nahin bola

bahut hi dam bhara karte the aada aashnai ka

main dil par choT khaun un pari-ruon ke hathon se

mujhe nusKHa agar koi bata de momyai ka

sar-e-mahfil har ek se be-jhijhak aankhen laData hai

uThaya hai but-e-pur-fan ne kya beDa DhiTai ka