agar kabe ka ruKH bhi jaanib-e-mai-KHana ho jae

agar kaabe kā ruḳh bhī jānib-e-mai-ḳhāna ho jaa.e

to phir sajda mirī har laġhzish-e-mastāna ho jaa.e

vahī dil hai jo husn-o-ishq kā kāshāna ho jaa.e

vo sar hai jo kisī kī teġh kā nazrāna ho jaa.e

ye achchhī parda-dārī hai ye achchhī rāzdārī hai

ki jo aa.e tumhārī bazm meñ dīvāna ho jaa.e

mirā sar kaT ke maqtal meñ gire qātil ke qadmoñ par

dam-e-āḳhir adā yuuñ sajda-e-shukrāna ho jaa.e

tirī sarkār meñ laayā huuñ Daalī hasrat-e-dil kī

ajab kyā hai mirā manzūr ye nazrāna ho jaa.e

shab-e-furqat kā jab kuchh tuul kam honā nahīñ mumkin

to merī zindagī kā muḳhtasar afsāna ho jaa.e

vo sajde jin se barsoñ ham ne ka.abe ko sajāyā hai

jo but-ḳhāne ko mil jaa.eñ to phir but-ḳhāna ho jaa.e

kisī kī zulf bikhre aur bikhar kar dosh par aa.e

dil-e-sad-chāk uljhe aur ulajh kar shāna ho jaa.e

yahāñ honā na honā hai na honā ain honā hai

jise honā ho kuchh ḳhāk-e-dar-e-jānāna ho jaa.e

sahar tak sab kā hai anjām jal kar ḳhaak ho jaanā

bane mahfil meñ koī sham.a yā parvāna ho jaa.e

vo mai de de jo pahle shiblī o mansūr ko dī thī

to 'bedam' bhī nisār-e-murshid-e-mai-ḳhāna ho jaa.e

agar kabe ka ruKH bhi jaanib-e-mai-KHana ho jae

to phir sajda meri har laghzish-e-mastana ho jae

wahi dil hai jo husn-o-ishq ka kashana ho jae

wo sar hai jo kisi ki tegh ka nazrana ho jae

ye achchhi parda-dari hai ye achchhi raazdari hai

ki jo aae tumhaari bazm mein diwana ho jae

mera sar kaT ke maqtal mein gire qatil ke qadmon par

dam-e-aKHir ada yun sajda-e-shukrana ho jae

teri sarkar mein laya hun Dali hasrat-e-dil ki

ajab kya hai mera manzur ye nazrana ho jae

shab-e-furqat ka jab kuchh tul kam hona nahin mumkin

to meri zindagi ka muKHtasar afsana ho jae

wo sajde jin se barson hum ne kabe ko sajaya hai

jo but-KHane ko mil jaen to phir but-KHana ho jae

kisi ki zulf bikhre aur bikhar kar dosh par aae

dil-e-sad-chaak uljhe aur ulajh kar shana ho jae

yahan hona na hona hai na hona ain hona hai

jise hona ho kuchh KHak-e-dar-e-jaanana ho jae

sahar tak sab ka hai anjam jal kar KHak ho jaana

bane mahfil mein koi shama ya parwana ho jae

wo mai de de jo pahle shibli o mansur ko di thi

to 'bedam' bhi nisar-e-murshid-e-mai-KHana ho jae