agarche aaina-e-dil mein hai qayam us ka

agarche ā.ina-e-dil meñ hai qayām us kā

na koī shakl hai us kī na koī naam us kā

vahī ḳhudā kabhī milvā.egā hameñ us se

jo intizār karātā hai sub.h o shaam us kā

hamāre saath nahīñ jā sakā thā vo lekin

rahā ḳhayāl siyāhat meñ gaam gaam us kā

ḳhudā ko pyaar hai apne har ek bande se

safed-fām hai us kā siyāh-fām us kā

kamā ke dete haiñ jo maal vo amīroñ ko

hisāb kyuuñ nahīñ lete kabhī avaam us kā

hamārā farz hai be-lāg raa.e kā iz.hār

koī durust kahe yā ġhalat ye kaam us kā

kahāñ hai shaiḳh ko sudh-budh mazīd piine kī

nasha utaar ga.e tiin chaar jaam us kā

zabān-e-dil se koī shā.irī sunātā hai

to sāma.īn bhulāte nahīñ kalām us kā

'shu.ūr' sab se alag baiThtā hai mahfil meñ

isī se aap samajh lījiye maqām us kā

agarche aaina-e-dil mein hai qayam us ka

na koi shakl hai us ki na koi nam us ka

wahi KHuda kabhi milwaega hamein us se

jo intizar karaata hai subh o sham us ka

hamare sath nahin ja saka tha wo lekin

raha KHayal siyahat mein gam gam us ka

KHuda ko pyar hai apne har ek bande se

safed-fam hai us ka siyah-fam us ka

kama ke dete hain jo mal wo amiron ko

hisab kyun nahin lete kabhi awam us ka

hamara farz hai be-lag rae ka izhaar

koi durust kahe ya ghalat ye kaam us ka

kahan hai shaiKH ko sudh-budh mazid pine ki

nasha utar gae tin chaar jam us ka

zaban-e-dil se koi shairi sunata hai

to samain bhulate nahin kalam us ka

'shuur' sab se alag baiThta hai mahfil mein

isi se aap samajh lijiye maqam us ka