ajnabi musafir ko rasta dikhaega

ajnabī musāfir ko rāsta dikhā.egā

kaun apnī chaukhaT par ab diyā jalā.egā

jitnī ne.amateñ hoñgī ḳhuub DaT ke khā.egā

phir hameñ qanā.at kā vo sabaq paḌhā.egā

pahle aane vaale hī luuT le ga.e sab maal

ba.ad meñ jo aa.egā ḳhālī haath jā.egā

peT hai agar ḳhālī phir kahāñ kī ḳhuddārī

bhuuk jab satā.egī ḳhud ko bech khā.egā

sab kī apnī rāheñ haiñ sab kī apnī samteñ haiñ

kaun aise aalam meñ kārvāñ bānegā

jis kī umr guzrī ho reshmī shabistāñ meñ

kyā vo hāñpte din kī dāstāñ sunā.egā

aa.ina sifat logo yuuñ raho na parde meñ

varna kaun duniyā ko aa.ina dikhā.egā

ham jo mil ke aapas meñ raushnī luTā.eñge

maiñ bhī jagmagā.uñgā tū bhī jagmagā.egā

phir vo degā ḳhush-ḳhabarī ham ko paar utarne kī

phir nadī meñ kāġhaz kī naav vo bahā.egā

merī jaḌ bhī kāTegā vaqt par pas-e-parda

vo mirī himāyat meñ haath bhī uThā.egā

mahfileñ faqīroñ kī boriye pe sajtī haiñ

bārgāh-e-shāhī ko kaun muñh lagā.egā

afsaroñ ke ḳhādim sab juT ga.e safā.ī meñ

'māhir' apnī bastī meñ aaj kaun aa.egā

ajnabi musafir ko rasta dikhaega

kaun apni chaukhaT par ab diya jalaega

jitni neamaten hongi KHub DaT ke khaega

phir hamein qanaat ka wo sabaq paDhaega

pahle aane wale hi luT le gae sab mal

baad mein jo aaega KHali hath jaega

peT hai agar KHali phir kahan ki KHuddari

bhuk jab sataegi KHud ko bech khaega

sab ki apni rahen hain sab ki apni samten hain

kaun aise aalam mein karwan banega

jis ki umr guzri ho reshmi shabistan mein

kya wo hanpte din ki dastan sunaega

aaina sifat logo yun raho na parde mein

warna kaun duniya ko aaina dikhaega

hum jo mil ke aapas mein raushni luTaenge

main bhi jagmagaunga tu bhi jagmagaega

phir wo dega KHush-KHabari hum ko par utarne ki

phir nadi mein kaghaz ki naw wo bahaega

meri jaD bhi kaTega waqt par pas-e-parda

wo meri himayat mein hath bhi uThaega

mahfilen faqiron ki boriye pe sajti hain

bargah-e-shahi ko kaun munh lagaega

afsaron ke KHadim sab juT gae safai mein

'mahir' apni basti mein aaj kaun aaega