ashk-e-gham wo hai jo duniya ko dikha bhi na sakun

ashk-e-ġham vo hai jo duniyā ko dikhā bhī na sakūñ

aur gir jaa.e zamīñ par to uThā bhī na sakūñ

ye mire ġham kā fasāna hai rahegā lab par

terī rūdād nahīñ hai ki sunā bhī na sakūñ

partav-e-husn huuñ is vāste mahdūd huuñ maiñ

husn ho jā.ūñ to duniyā meñ samā bhī na sakūñ

tez kuchh vaqt kī raftār nahīñ hai lekin

tum agar saath na do paañv baḌhā bhī na sakūñ

ab vahī log bigāḌī hai jinhoñ ne qismat

chāhte haiñ ki maiñ taqdīr banā bhī na sakūñ

aaj nākām sahī kal kā bharosa hai mujhe

ishq phir kyā jo tujhe apnā banā bhī na sakūñ

dil kahāñ ek siyah-ḳhāna hai ranj-o-ġham kā

is qadar daaġh lage haiñ ki miTā bhī na sakūñ

dil kī gahrā.ī se ai dost zarā kah to sahī

jaan aisī to nahīñ jis ko gañvā bhī na sakūñ

umr guzrī kabhī saaqī ne 'falak' ye na kahā

itnī pī le ki tujhe hosh meñ lā bhī na sakūñ

ashk-e-gham wo hai jo duniya ko dikha bhi na sakun

aur gir jae zamin par to uTha bhi na sakun

ye mere gham ka fasana hai rahega lab par

teri rudad nahin hai ki suna bhi na sakun

partaw-e-husn hun is waste mahdud hun main

husn ho jaun to duniya mein sama bhi na sakun

tez kuchh waqt ki raftar nahin hai lekin

tum agar sath na do panw baDha bhi na sakun

ab wahi log bigaDi hai jinhon ne qismat

chahte hain ki main taqdir bana bhi na sakun

aaj nakaam sahi kal ka bharosa hai mujhe

ishq phir kya jo tujhe apna bana bhi na sakun

dil kahan ek siyah-KHana hai ranj-o-gham ka

is qadar dagh lage hain ki miTa bhi na sakun

dil ki gahrai se ai dost zara kah to sahi

jaan aisi to nahin jis ko ganwa bhi na sakun

umr guzri kabhi saqi ne 'falak' ye na kaha

itni pi le ki tujhe hosh mein la bhi na sakun