bandh len hath pe sine pe saja len tumko

bāñdh leñ haath pe siine pe sajā leñ tum ko

jī meñ aatā hai ki ta.avīz banā leñ tum ko

phir tumheñ roz sañvāreñ tumheñ baḌhtā dekheñ

kyuuñ na āñgan meñ chamelī sā lagā leñ tum ko

jaise bāloñ meñ koī phuul chunā kartā hai

ghar ke gul-dān meñ phūloñ sā sajā leñ tum ko

kyā ajab ḳhvāhisheñ uThtī haiñ hamāre dil meñ

kar ke munnā sā havāoñ meñ uchhāleñ tum ko

is qadar TuuT ke tum pe hameñ pyaar aatā hai

apnī bāñhoñ meñ bhareñ maar hī Dāleñ tum ko

kabhī ḳhvāboñ kī tarah aañkh ke parde meñ raho

kabhī ḳhvāhish kī tarah dil meñ bulā leñ tum ko

hai tumhāre liye kuchh aisī aqīdat dil meñ

apne hāthoñ meñ duāoñ sā uThā leñ tum ko

jaan dene kī ijāzat bhī nahīñ dete ho

varna mar jaa.eñ abhī mar ke manā leñ tum ko

jis tarah raat ke siine meñ hai mahtāb kā nuur

apne tārīk makānoñ meñ sajā leñ tum ko

ab to bas ek hī ḳhvāhish hai kisī moḌ par tum

ham ko bikhre hue mil jaao sambhāleñ tum ko

bandh len hath pe sine pe saja len tum ko

ji mein aata hai ki tawiz bana len tum ko

phir tumhein roz sanwaren tumhein baDhta dekhen

kyun na aangan mein chameli sa laga len tum ko

jaise baalon mein koi phul chuna karta hai

ghar ke gul-dan mein phulon sa saja len tum ko

kya ajab KHwahishen uThti hain hamare dil mein

kar ke munna sa hawaon mein uchhaalen tum ko

is qadar TuT ke tum pe hamein pyar aata hai

apni banhon mein bharen mar hi Dalen tum ko

kabhi KHwabon ki tarah aankh ke parde mein raho

kabhi KHwahish ki tarah dil mein bula len tum ko

hai tumhaare liye kuchh aisi aqidat dil mein

apne hathon mein duaon sa uTha len tum ko

jaan dene ki ijazat bhi nahin dete ho

warna mar jaen abhi mar ke mana len tum ko

jis tarah raat ke sine mein hai mahtab ka nur

apne tarik makanon mein saja len tum ko

ab to bas ek hi KHwahish hai kisi moD par tum

hum ko bikhre hue mil jao sambhaalen tum ko