bahut be-kar mausam hai magar kuchh kaam karna hai

bahut be-kār mausam hai magar kuchh kaam karnā hai

ki taaza zaḳhm milne tak purānā zaḳhm bharnā hai

abhī saada varaq par naam terā likh ke baiThā huuñ

abhī is meñ mahak aanī hai titlī ne utarnā hai

baḌhe jo habs to shāḳheñ hilā denā ki ab ham ko

havā ke saath jiinā hai havā ke saath marnā hai

mabādā us ko diqqat ho nishāne tak pahuñchne meñ

so maiñ ne phuul se dīvār ke raḳhne ko bharnā hai

yahī ik shaġhl rakhnā hai aziyyat ke dinoñ meñ bhī

kisī ko bhuul jaanā hai kisī ko yaad karnā hai

koī chehra na ban paayā muqaddar kī lakīroñ se

so ab apnī hathelī meñ mujhe ḳhud rañg bharnā hai

koī rasta mile kyūñkar mire pā-e-ḳhajālat ko

yahāñ to paañv dharnā bhī koī ilzām dharnā hai

vo har lamha duā dete haiñ lambī umr kī 'tābish'

mujhe lagtā hai pyāroñ ko bhī ruḳhsat maiñ ne karnā hai

bahut be-kar mausam hai magar kuchh kaam karna hai

ki taza zaKHm milne tak purana zaKHm bharna hai

abhi sada waraq par nam tera likh ke baiTha hun

abhi is mein mahak aani hai titli ne utarna hai

baDhe jo habs to shaKHen hila dena ki ab hum ko

hawa ke sath jina hai hawa ke sath marna hai

mabaada us ko diqqat ho nishane tak pahunchne mein

so main ne phul se diwar ke raKHne ko bharna hai

yahi ek shaghl rakhna hai aziyyat ke dinon mein bhi

kisi ko bhul jaana hai kisi ko yaad karna hai

koi chehra na ban paya muqaddar ki lakiron se

so ab apni hatheli mein mujhe KHud rang bharna hai

koi rasta mile kyunkar mere pa-e-KHajalat ko

yahan to panw dharna bhi koi ilzam dharna hai

wo har lamha dua dete hain lambi umr ki 'tabish'

mujhe lagta hai pyaron ko bhi ruKHsat main ne karna hai