bhaTka karunga kab tak rahon mein teri aa kar

bhaTkā karūñgā kab tak rāhoñ meñ terī aa kar

tujh ko bhulā sukūñ maiñ mere liye duā kar

kab tak ye terī hasrat kab tak ye merī vahshat

in saarī bandishoñ se mujh ko kabhī rihā kar

ek umr se tujhe maiñ be-uzr pī rahā huuñ

tū bhī to pyaas merī ai jaam pī liyā kar

kal raat zindagī ye mujh se taḌap ke bolī

kuchh der ko to ho kar merā bhī tū rahā kar

rishte ka.ī sunahre is zindagī se paa.e

rakkhā magar na ham ne un ko kabhī bachā kar

dil ke khañDar se panchhī yādoñ ke jā na paa.e

dekhā hai ham ne un ko kitnī hī baar uḌā kar

vo qurb ho ki duurī sab ḳhvāhisheñ adhūrī

'ālok' aa ga.e haiñ dariyā meñ ham bahā kar

bhaTka karunga kab tak rahon mein teri aa kar

tujh ko bhula sukun main mere liye dua kar

kab tak ye teri hasrat kab tak ye meri wahshat

in sari bandishon se mujh ko kabhi riha kar

ek umr se tujhe main be-uzr pi raha hun

tu bhi to pyas meri ai jam pi liya kar

kal raat zindagi ye mujh se taDap ke boli

kuchh der ko to ho kar mera bhi tu raha kar

rishte kai sunahre is zindagi se pae

rakkha magar na hum ne un ko kabhi bacha kar

dil ke khanDar se panchhi yaadon ke ja na pae

dekha hai hum ne un ko kitni hi bar uDa kar

wo qurb ho ki duri sab KHwahishen adhuri

'alok' aa gae hain dariya mein hum baha kar