bijli giri hai kal kisi ujDe makan par

bijlī girī hai kal kisī ujḌe makān par

rone lagūñ ki hañs paḌūñ is dāstān par

vo qahr thā ki raat kā patthar pighal paḌā

kyā ātishīñ gulāb khilā āsmān par

ik naqsh sā nikhartā rahegā nigāh meñ

ik harf sā laraztā rahegā zabān par

apne liye hī aañkh kā parda huuñ raat din

maiñ varna āshkār huuñ saare jahān par

sher aa ke chiir phaaḌ gayā mujh ko ḳhvāb meñ

dam-bhar ko merī aañkh lagī thī machān par

pyāsī hai ruuh jism sharābor hai to kyā

be-kār meñh barastā rahā sā.ebān par

piilī havā meñ ḳhuun kā zarra uḌā hī thā

pāgal huā ye shahr zarā se nishān par

ḳhālī paḌī haiñ bed kī bīmār kursiyāñ

ḳhūñ-ḳhvāb dhūp-dhund barastī hai lawn par

kis taaza mā'rke pe gayā aaj phir 'zafar'

talvār taaq meñ hai na ghoḌā hai thaan par

bijli giri hai kal kisi ujDe makan par

rone lagun ki hans paDun is dastan par

wo qahr tha ki raat ka patthar pighal paDa

kya aatishin gulab khila aasman par

ek naqsh sa nikharta rahega nigah mein

ek harf sa larazta rahega zaban par

apne liye hi aankh ka parda hun raat din

main warna aashkar hun sare jahan par

sher aa ke chir phaD gaya mujh ko KHwab mein

dam-bhar ko meri aankh lagi thi machan par

pyasi hai ruh jism sharabor hai to kya

be-kar meinh barasta raha saeban par

pili hawa mein KHun ka zarra uDa hi tha

pagal hua ye shahr zara se nishan par

KHali paDi hain bed ki bimar kursiyan

KHun-KHwab dhup-dhund barasti hai lawn par

kis taza ma'rke pe gaya aaj phir 'zafar'

talwar taq mein hai na ghoDa hai than par