chahta hun ki tera hijr musibat na lage

chāhtā huuñ ki tirā hijr musībat na lage

ab koī zaḳhm tire ġham kī badaulat na lage

us kī yādoñ kā safar ḳhatm karūñ ro.e baġhair

ġhair mumkin hai ki is kaam meñ hikmat na lage

zarf TuuTe hue kashkol se gir saktā hai

aisī imdād se bachnā jo saḳhāvat na lage

shahr-dar-shahr mujhe ḳhaak uḌānī hai magar

is pe ye shart masāfat bhī masāfat na lage

aao a.amāl-tarāshī kī rehearsal kar leñ

taaki jab us ko pukāreñ to mashaqqat na lage

ek sajda mirī peshānī ko darkār hai jo

hasb-e-taufīq lage hasb-e-zarūrat na lage

tab maiñ samjhūñgā ki is nafs ne khaa.ī hai shikast

rā.egāñ shai jo mujhe māl-e-ġhanīmat na lage

chahta hun ki tera hijr musibat na lage

ab koi zaKHm tere gham ki badaulat na lage

us ki yaadon ka safar KHatm karun roe baghair

ghair mumkin hai ki is kaam mein hikmat na lage

zarf TuTe hue kashkol se gir sakta hai

aisi imdad se bachna jo saKHawat na lage

shahr-dar-shahr mujhe KHak uDani hai magar

is pe ye shart masafat bhi masafat na lage

aao aamal-tarashi ki rehearsal kar len

taki jab us ko pukaren to mashaqqat na lage

ek sajda meri peshani ko darkar hai jo

hasb-e-taufiq lage hasb-e-zarurat na lage

tab main samjhunga ki is nafs ne khai hai shikast

raegan shai jo mujhe mal-e-ghanimat na lage