chand sa chehra nur ki chitwan masha-allah masha-allah

chāñd sā chehra nuur kī chitvan māshā-allāh māshā-allāh

turfa nikālā aap ne joban māshā-allāh māshā-allāh

gul ruḳh-e-nāzuk zulf hai sumbul aañkh hai nargis seb-e-zanaḳhdāñ

husn se tum ho ġhairat-e-gulshan māshā-allāh māshā-allāh

sāqī-e-bazm-e-roz-e-azal ne bāda-e-husn bharā hai is meñ

āñkheñ haiñ sāġhar shīsha hai gardan māshā-allāh māshā-allāh

qahr ġhazab zāhir kī rukāvaT āfat-e-jāñ dar-parda lagāvaT

chaah kī tevar pyaar kī chitvan māshā-allāh māshā-allāh

ġhamza uchakkā ishva hai Daaku qahr adā.eñ sehr haiñ bāteñ

chor nigāheñ naaz hai rahzan māshā-allāh māshā-allāh

nuur kā tan hai nuur ke kapḌe us par kyā zevar kī chamak hai

chhalle kañgan ikke joshan māshā-allāh māshā-allāh

jam.a kiyā ziddain ko tum ne saḳhtī aisī narmī aisī

mom badan hai dil hai aahan māshā-allāh māshā-allāh

vaah 'amīr' aisā ho kahnā sher haiñ yā ma.ashūq kā gahna

saaf hai bandish mazmūñ raushan māshā-allāh māshā-allāh

chand sa chehra nur ki chitwan masha-allah masha-allah

turfa nikala aap ne joban masha-allah masha-allah

gul ruKH-e-nazuk zulf hai sumbul aankh hai nargis seb-e-zanaKHdan

husn se tum ho ghairat-e-gulshan masha-allah masha-allah

saqi-e-bazm-e-roz-e-azal ne baada-e-husn bhara hai is mein

aankhen hain saghar shisha hai gardan masha-allah masha-allah

qahr ghazab zahir ki rukawaT aafat-e-jaan dar-parda lagawaT

chah ki tewar pyar ki chitwan masha-allah masha-allah

ghamza uchakka ishwa hai Daku qahr adaen sehr hain baaten

chor nigahen naz hai rahzan masha-allah masha-allah

nur ka tan hai nur ke kapDe us par kya zewar ki chamak hai

chhalle kangan ikke joshan masha-allah masha-allah

jama kiya ziddain ko tum ne saKHti aisi narmi aisi

mom badan hai dil hai aahan masha-allah masha-allah

wah 'amir' aisa ho kahna sher hain ya mashuq ka gahna

saf hai bandish mazmun raushan masha-allah masha-allah