chaaragaron ne bandh diya mujhko baKHt se

chāragaroñ ne bāñdh diyā mujh ko baḳht se

chhāñv milī na mujh ko duā ke daraḳht se

baiThā thā maiñ hisār-e-falak meñ zamīn par

dushman ne fat.h khīñch lī merī shikast se

maiñ bhī to thā farefta ḳhud apne-āp par

shikva karūñ maiñ kyā dil-e-nargis-parast se

girya kī saltanat mujhe degī shikast kyā

chhīnī hai maiñ ne zindagī paanī ke taḳht se

harf-e-duā pe gosh-bar-āvāz ho vo kyuuñ

dil se kalām hotā hai mastoñ ke mast se

hamd-o-sanā suḳhan kā nahīñ dil kā hai riyāz

kaise sanā karūñ maiñ dil-e-laḳht-laḳht se

ahl-e-ḳhirad ise na samajh pā.eñge 'faqīh'

kuchh mas.ale haiñ māvarā fat.h o shikast se

chaaragaron ne bandh diya mujh ko baKHt se

chhanw mili na mujh ko dua ke daraKHt se

baiTha tha main hisar-e-falak mein zamin par

dushman ne fath khinch li meri shikast se

main bhi to tha farefta KHud apne-ap par

shikwa karun main kya dil-e-nargis-parast se

girya ki saltanat mujhe degi shikast kya

chhini hai main ne zindagi pani ke taKHt se

harf-e-dua pe gosh-bar-awaz ho wo kyun

dil se kalam hota hai maston ke mast se

hamd-o-sana suKHan ka nahin dil ka hai riyaz

kaise sana karun main dil-e-laKHt-laKHt se

ahl-e-KHirad ise na samajh paenge 'faqih'

kuchh masale hain mawara fath o shikast se