chalo ye to hadsa ho gaya ki wo saeban nahin raha

chalo ye to hādsa ho gayā ki vo sā.ebān nahīñ rahā

zarā ye bhī soch lo ek din agar āsmān nahīñ rahā

ye batā ki kaun sī jañg meñ maiñ lahūluhān nahīñ rahā

magar aaj bhī tire shahr meñ koī mujh ko maan nahīñ rahā

ye nahīñ ki merī zamīn par koī āsamān nahīñ rahā

magar āsmān kabhī mire tire darmiyān nahīñ rahā

shab-e-hijr ne havas aur ishq ke saare farq miTā diye

koī chārpā.ī chaTaḳh ga.ī to kisī meñ baan nahīñ rahā

sabhī zindagī pe farefta koī maut par nahīñ shefta

sabhī sūd-ḳhor to ho ga.e haiñ koī paThān nahīñ rahā

na laboñ pe ġham kī hikāyateñ na vo be-ruḳhī kī shikāyateñ

ye itaab hai shab-e-vasl kā ki maiñ ḳhush-bayān nahīñ rahā

isī be-ruḳhī meñ hazār ruḳh haiñ purāne rishte ke sāhibo

koī kam nahīñ hai ki jaan kar bhī vo mujh ko jaan nahīñ rahā

chalo ye to hadsa ho gaya ki wo saeban nahin raha

zara ye bhi soch lo ek din agar aasman nahin raha

ye bata ki kaun si jang mein main lahuluhan nahin raha

magar aaj bhi tere shahr mein koi mujh ko man nahin raha

ye nahin ki meri zamin par koi aasaman nahin raha

magar aasman kabhi mere tere darmiyan nahin raha

shab-e-hijr ne hawas aur ishq ke sare farq miTa diye

koi chaarpai chaTaKH gai to kisi mein ban nahin raha

sabhi zindagi pe farefta koi maut par nahin shefta

sabhi sud-KHor to ho gae hain koi paThan nahin raha

na labon pe gham ki hikayaten na wo be-ruKHi ki shikayaten

ye itab hai shab-e-wasl ka ki main KHush-bayan nahin raha

isi be-ruKHi mein hazar ruKH hain purane rishte ke sahibo

koi kam nahin hai ki jaan kar bhi wo mujh ko jaan nahin raha