dam to de na gae chhuTta mala kaisa

daam to de na ga.e chhūTtā maalā kaisā

kal mahājan muā kartā thā taqāzā kaisā

vahī mastī kī buā baat thī mujrā kaisā

muñh-lagoñ ne kiyā navvāb ko rusvā kaisā

roTī mumkin nahīñ bhaḌve se to kapḌā kaisā

chhoḌ DhagḌe ko arī roz kā jhagḌā kaisā

kyā kahūñ ai buā bigḌā hai gharauñdā kaisā

kankarī nuun kī ghar meñ nahīñ aaTā kaisā

raat maamā ne jo sāqan ke kane dekh liyā

dam lagā kar muā dam-bāz vo khiskā kaisā

toḌ kar Thahrā buā paan kaTorī ke liye

aaj uḌtā hai muā chiḌiyā kā paTThā kaisā

hāthā-pā.ī nahīñ saukan se huī gar qibla

ban gayā abr-e-siyah barq sā pinDā kaisā

kaalā muñh nauj ho aisā kisī bandī ko nasīb

dāḌhī munDā muā lagtā hai bhujañgā kaisā

vo shab-e-māh meñ piite rahe gauhar ko liye

rashk khāyā kiye ham ai buā kaisā kaisā

jhāñk kar añgiyā kī dīvār se bangle kī bahār

ghaaT par aaj utar aaya hai paTThā kaisā

shauq se aa.eñ vo jab chāheñ takalluf kyā hai

dūlhā bhaa.ī se mujhe ai buā pardā kaisā

jāntī ḳhuub huuñ maiñ gurba-e-miskīn hai shaiḳh

vaqt-e-matlab muā ban jaatā hai ghunnā kaisā

pahnī kurtī buā begam ne aTangī aisī

nuur chhan-chhan ke nikaltā hai nazārā kaisā

nahīñ dāmād agar aa.e to beTī ke liye

aaj namgīrā mirī saas ne taanā kaisā

nahīñ maiñ ujḌī faqat yaar kī bigḌī guyyāñ

dekho bigḌā huā hai bazm kā naqshā kaisā

aisī jhijkī maiñ shab-e-vasl ki be-taur huī

uThā rah-rah ke dil-e-zār meñ dhachkā kaisā

paanī piine ke bahāne se chale aa.e jo ham

paanī pī pī ke vo kosā kiye kaisā kaisā

jī meñ hai phoḌ duuñ maiñ miir kī donoñ vallāh

ghūrtā phaaḌ ke diide hai nigoḌā kaisā

yahī to ranj hai begam buā sīdhā ho kar

paḌ gayā yaar hamārā muā ulTā kaisā

kasbiyoñ kī sī nahīñ vaz.a to hai hai baajī

arī pājāma kī ye goT meñ lachkā kaisā

jaadū kar kar ke buā ban gayā 'mohsin' apnā

yaad us reḳhtī vaale ko hai laTkā kaisā

dam to de na gae chhuTta mala kaisa

kal mahajan mua karta tha taqaza kaisa

wahi masti ki bua baat thi mujra kaisa

munh-lagon ne kiya nawwab ko ruswa kaisa

roTi mumkin nahin bhaDwe se to kapDa kaisa

chhoD DhagDe ko ari roz ka jhagDa kaisa

kya kahun ai bua bigDa hai gharaunda kaisa

kankari nun ki ghar mein nahin aaTa kaisa

raat mama ne jo saqan ke kane dekh liya

dam laga kar mua dam-baz wo khiska kaisa

toD kar Thahra bua pan kaTori ke liye

aaj uDta hai mua chiDiya ka paTTha kaisa

hatha-pai nahin saukan se hui gar qibla

ban gaya abr-e-siyah barq sa pinDa kaisa

kala munh nauj ho aisa kisi bandi ko nasib

daDhi munDa mua lagta hai bhujanga kaisa

wo shab-e-mah mein pite rahe gauhar ko liye

rashk khaya kiye hum ai bua kaisa kaisa

jhank kar angiya ki diwar se bangle ki bahaar

ghaT par aaj utar aaya hai paTTha kaisa

shauq se aaen wo jab chahen takalluf kya hai

dulha bhai se mujhe ai bua parda kaisa

jaanti KHub hun main gurba-e-miskin hai shaiKH

waqt-e-matlab mua ban jata hai ghunna kaisa

pahni kurti bua begam ne aTangi aisi

nur chhan-chhan ke nikalta hai nazara kaisa

nahin damad agar aae to beTi ke liye

aaj namgira meri sas ne tana kaisa

nahin main ujDi faqat yar ki bigDi guyyan

dekho bigDa hua hai bazm ka naqsha kaisa

aisi jhijki main shab-e-wasl ki be-taur hui

uTha rah-rah ke dil-e-zar mein dhachka kaisa

pani pine ke bahane se chale aae jo hum

pani pi pi ke wo kosa kiye kaisa kaisa

ji mein hai phoD dun main mir ki donon wallah

ghurta phaD ke dide hai nigoDa kaisa

yahi to ranj hai begam bua sidha ho kar

paD gaya yar hamara mua ulTa kaisa

kasbiyon ki si nahin waza to hai hai baji

ari pajama ki ye goT mein lachka kaisa

jadu kar kar ke bua ban gaya 'mohsin' apna

yaad us reKHti wale ko hai laTka kaisa