dar-parda sitam hum pe wo kar jate hain kaise

dar-parda sitam ham pe vo kar jaate haiñ kaise

gar kiije gilā saaf mukar jaate haiñ kaise

aane meñ to sau tarah kī sohbat thī shab-e-vasl

dekheñge par ab uTh ke sahar jaate haiñ kaise

ranjish kā mirī paas nahīñ aap ko mutlaq

barham tujhe ham dekh ke Dar jaate haiñ kaise

ġhusse meñ nayā rang nikāle haiñ parī-rū

juuñ juuñ ye bigaḌte haiñ sañvar jaate haiñ kaise

us sāhib-e-ismat ko yahī soch hai har sub.h

be-vaj.h mire baal bikhar jaate haiñ kaise

ayyām musībat ke to kaaTe nahīñ kaTte

din aish ke ghaḌiyoñ meñ guzar jaate haiñ kaise

vo vaqt to aane de batā deñge 'shahīdī'

bin aa.e kisī shaḳhs pe mar jaate haiñ kaise

dar-parda sitam hum pe wo kar jate hain kaise

gar kije gila saf mukar jate hain kaise

aane mein to sau tarah ki sohbat thi shab-e-wasl

dekhenge par ab uTh ke sahar jate hain kaise

ranjish ka meri pas nahin aap ko mutlaq

barham tujhe hum dekh ke Dar jate hain kaise

ghusse mein naya rang nikale hain pari-ru

jun jun ye bigaDte hain sanwar jate hain kaise

us sahib-e-ismat ko yahi soch hai har subh

be-wajh mere baal bikhar jate hain kaise

ayyam musibat ke to kaTe nahin kaTte

din aish ke ghaDiyon mein guzar jate hain kaise

wo waqt to aane de bata denge 'shahidi'

bin aae kisi shaKHs pe mar jate hain kaise