dard ghazal mein Dhalne se katraata hai

dard ġhazal meñ Dhalne se katrātā hai

ḳhālī kāġhaz merī hañsī uḌātā hai

kis chāhat se qalam pakaḌ kar baiThe the

ab to ek bhī lafz nahīñ ban aatā hai

āḌī-tirchhī lakīroñ se kab baat banī

shauq andhā hai havā pe naqsh banātā hai

kis kī sadā.eñ merā ta.āqub kartī haiñ

des nikāle shaḳhs ko kaun bulātā hai

yādeñ Tīseñ sī ban kar rah jaatī haiñ

guzrā mausam phir kab lauT ke aatā hai

kis kā rasta dekh rahe haiñ ghar ke kivāḌ

suunā suunā āñgan kise bulātā hai

kin kin sahrāoñ kī ḳhaak uḌānī paḌī

dil bhī kaise kaise naach bachātā hai

jhūTī sachchī jo jī chāhe kahte jaao

kaun kisī ke dil meñ utrā jaatā hai

vaqt kī baat hai pyāre chāhe maan na maan

mīThā kaḌvā sab sunñā paḌ jaatā hai

mere aage bhaag rahe haiñ chāñd 'riyāz'

mere pīchhe merā saaya aatā hai

dard ghazal mein Dhalne se katraata hai

KHali kaghaz meri hansi uData hai

kis chahat se qalam pakaD kar baiThe the

ab to ek bhi lafz nahin ban aata hai

aaDi-tirchhi lakiron se kab baat bani

shauq andha hai hawa pe naqsh banata hai

kis ki sadaen mera taaqub karti hain

des nikale shaKHs ko kaun bulata hai

yaaden Tisen si ban kar rah jati hain

guzra mausam phir kab lauT ke aata hai

kis ka rasta dekh rahe hain ghar ke kiwaD

suna suna aangan kise bulata hai

kin kin sahraon ki KHak uDani paDi

dil bhi kaise kaise nach bachata hai

jhuTi sachchi jo ji chahe kahte jao

kaun kisi ke dil mein utra jata hai

waqt ki baat hai pyare chahe man na man

miTha kaDwa sab sunna paD jata hai

mere aage bhag rahe hain chand 'riyaz'

mere pichhe mera saya aata hai