dard jab se dil-nashin hai ishq hai

dard jab se dil-nashīñ hai ishq hai

is makāñ meñ kuchh nahīñ hai ishq hai

dekh dasht-e-yād kā e.ajāz dekh

maiñ kahīñ huuñ tū kahīñ hai ishq hai

thak ke baiThā huuñ jo kunj-e-zāt meñ

mehrbāñ koī nahīñ hai ishq hai

jo azal se hijratī haiñ ashk haiñ

jo in ashkoñ meñ makīñ hai ishq hai

ai sarāb-e-jabr-o-istibdād sun

ye jo pyāsoñ kā yaqīñ hai ishq hai

kal jahāñ dīvār hī dīvār thī

ab vahāñ dar hai jabīñ hai ishq hai

ḳhvāb hī meñ dekh le tābīr-e-ḳhvāb

kaun aisā pesh-bīñ hai ishq hai

jīte-jī dushvār kitnā thā safar

ab na duniyā hai na diiñ hai ishq hai

ranj-o-ġham kī surma.ī chādar 'taqī'

jab se bālā-e-zamīñ hai ishq hai

dard jab se dil-nashin hai ishq hai

is makan mein kuchh nahin hai ishq hai

dekh dasht-e-yaad ka eajaz dekh

main kahin hun tu kahin hai ishq hai

thak ke baiTha hun jo kunj-e-zat mein

mehrban koi nahin hai ishq hai

jo azal se hijrati hain ashk hain

jo in ashkon mein makin hai ishq hai

ai sarab-e-jabr-o-istibdad sun

ye jo pyason ka yaqin hai ishq hai

kal jahan diwar hi diwar thi

ab wahan dar hai jabin hai ishq hai

KHwab hi mein dekh le tabir-e-KHwab

kaun aisa pesh-bin hai ishq hai

jite-ji dushwar kitna tha safar

ab na duniya hai na din hai ishq hai

ranj-o-gham ki surmai chadar 'taqi'

jab se baala-e-zamin hai ishq hai