daulat mili jahan ki nam-o-nishan mile

daulat milī jahān kī nām-o-nishāñ mile

sab kuchh milā hameñ na magar mehrbāñ mile

pahle bhī jaise dekh chuke hoñ unheñ kahīñ

anjān vādiyoñ meñ kuchh aise nishāñ mile

baḌhtā gayā maiñ manzil-e-mahbūb kī taraf

haa.il agarche raah meñ sañg-e-garāñ mile

ronā paḌā nasīb ke hāthoñ hazār baar

ik baar muskurā ke jo tum mehrbāñ mile

ham ko ḳhushī milī bhī to bas aarzī milī

lekin jo ġham mile vo ġham-e-jāvedāñ mile

baaqī rahegī hashr tak un ke karam kī yaad

mujh ko rah-e-hayāt meñ jo mehrbāñ mile

phir kyuuñ kare talāsh koī aur āstāñ

vo ḳhush-nasīb jis ko tirā āstāñ mile

ahl-e-sitam kī dil-shikanī kā sabab huā

dil kā ye hausla ki ġham be-karāñ mile

saaqī kī ik nigāh se kaayā palaT ga.ī

zāhid jo mai-kade meñ mile naujavāñ mile

dair-o-haram ke log bhī darmāñ na kar sake

vo bhī asīr-e-kashmakash-e-īn-o-āñ mile

nazreñ talāsh kartī rahīñ jin ko umr-bhar

'darshan' ko vo sukūn ke lamhe kahāñ mile

daulat mili jahan ki nam-o-nishan mile

sab kuchh mila hamein na magar mehrban mile

pahle bhi jaise dekh chuke hon unhen kahin

anjaan wadiyon mein kuchh aise nishan mile

baDhta gaya main manzil-e-mahbub ki taraf

hail agarche rah mein sang-e-garan mile

rona paDa nasib ke hathon hazar bar

ek bar muskura ke jo tum mehrban mile

hum ko KHushi mili bhi to bas aarzi mili

lekin jo gham mile wo gham-e-jawedan mile

baqi rahegi hashr tak un ke karam ki yaad

mujh ko rah-e-hayat mein jo mehrban mile

phir kyun kare talash koi aur aastan

wo KHush-nasib jis ko tera aastan mile

ahl-e-sitam ki dil-shikani ka sabab hua

dil ka ye hausla ki gham be-karan mile

saqi ki ek nigah se kaya palaT gai

zahid jo mai-kade mein mile naujawan mile

dair-o-haram ke log bhi darman na kar sake

wo bhi asir-e-kashmakash-e-in-o-an mile

nazren talash karti rahin jin ko umr-bhar

'darshan' ko wo sukun ke lamhe kahan mile