dayar-e-ishq mein raushan-dimagh the hum bhi

dayār-e-ishq meñ raushan-dimāġh the ham bhī

vo ḳhush-nazar thā bahut sabz-bāġh the ham bhī

har ek rishta thā munkir hamārī hastī se

nigār-e-zīst ke dāman kā daaġh the ham bhī

ḳhizāñ kā daur bhī hotā to fasl-e-gul hotī

kisī ke faiz-e-nazar se vo baaġh the ham bhī

ye aur baat hameñ aaj tum na pahchāno

tumhārī bazm kā raushan charāġh the ham bhī

mizāj hī nahīñ miltā to dostī kaisī

vo tund-ḳhū thā bahut bad-dimāġh the ham bhī

kahīñ pe chāñd kahīñ aa.ina kahīñ gul the

ye tum se kis ne kahā hai ayāġh the ham bhī

vo ham ko DhūñD bhī letā to kyā burā hotā

ki us kī zaat ke 'shabnam' surāġh the ham bhī

dayar-e-ishq mein raushan-dimagh the hum bhi

wo KHush-nazar tha bahut sabz-bagh the hum bhi

har ek rishta tha munkir hamari hasti se

nigar-e-zist ke daman ka dagh the hum bhi

KHizan ka daur bhi hota to fasl-e-gul hoti

kisi ke faiz-e-nazar se wo bagh the hum bhi

ye aur baat hamein aaj tum na pahchano

tumhaari bazm ka raushan charagh the hum bhi

mizaj hi nahin milta to dosti kaisi

wo tund-KHu tha bahut bad-dimagh the hum bhi

kahin pe chand kahin aaina kahin gul the

ye tum se kis ne kaha hai ayagh the hum bhi

wo hum ko DhunD bhi leta to kya bura hota

ki us ki zat ke 'shabnam' suragh the hum bhi