dekhte sajde mein aata hai jo karta hai nigah

dekhte sajde meñ aatā hai jo kartā hai nigāh

tere abrū kī hai mehrāb magar baitullāh

yak palak meñ vo kare piis ke faujeñ surma

jis taraf ko phire zālim tirī mizhgāñ kī sipāh

bait-bahsī na kar ai fāḳhta gulshan meñ ki aaj

misra-e-sarv se mauzūñ hai mirā misra-e-āh

kishvar-e-ishq kī shāhī hai magar majnūñ ko

ki zamīñ taḳht hai sar par hai bagūle kī kulāh

kyūñkar in kaalī balāoñ se bachegā āshiq

ḳhat siyah ḳhaal siyah zulf siyah chashm siyāh

chāhtā hai shab-e-zulfāñ kī tirī umr darāz

ki mire ishq kā hove nahīñ qissa kotāh

kyā kahe kyūñki kahe tujh se ye 'hātim' ġham-e-dil

ki vo hai sharm se mahjūb o tū hai be-parvāh

dekhte sajde mein aata hai jo karta hai nigah

tere abru ki hai mehrab magar baitullah

yak palak mein wo kare pis ke faujen surma

jis taraf ko phire zalim teri mizhgan ki sipah

bait-bahsi na kar ai faKHta gulshan mein ki aaj

misra-e-sarw se mauzun hai mera misra-e-ah

kishwar-e-ishq ki shahi hai magar majnun ko

ki zamin taKHt hai sar par hai bagule ki kulah

kyunkar in kali balaon se bachega aashiq

KHat siyah KHal siyah zulf siyah chashm siyah

chahta hai shab-e-zulfan ki teri umr daraaz

ki mere ishq ka howe nahin qissa kotah

kya kahe kyunki kahe tujh se ye 'hatim' gham-e-dil

ki wo hai sharm se mahjub o tu hai be-parwah