dil ko ehsas ki shiddat ne kahin ka na rakha

dil ko ehsās kī shiddat ne kahīñ kā na rakhā

ḳhud mohabbat ko mohabbat ne kahīñ kā na rakhā

bū-e-gul ab tujhe ehsās huā bhī ki tujhe

terī āvāra tabī.at ne kahīñ kā na rakhā

tum ko har shaḳhs se hai chashm-e-muravvat kī umiid

tum ko is chashm-e-muravvat ne kahīñ kā na rakhā

ham vo haiñ jin ko tamāsha-kada-e-hastī meñ

jalva-e-ālam-e-hairat ne kahīñ kā na rakhā

nigah-e-shauq kisī shai pe Thahartī hī nahīñ

is basārat ko basīrat ne kahīñ kā na rakhā

pahle ye shukr ki ham hadd-e-adab se na baḌhe

ab ye shikva ki sharāfat ne kahīñ kā na rakhā

dil ko ehsas ki shiddat ne kahin ka na rakha

KHud mohabbat ko mohabbat ne kahin ka na rakha

bu-e-gul ab tujhe ehsas hua bhi ki tujhe

teri aawara tabiat ne kahin ka na rakha

tum ko har shaKHs se hai chashm-e-murawwat ki umid

tum ko is chashm-e-murawwat ne kahin ka na rakha

hum wo hain jin ko tamasha-kada-e-hasti mein

jalwa-e-alam-e-hairat ne kahin ka na rakha

nigah-e-shauq kisi shai pe Thaharti hi nahin

is basarat ko basirat ne kahin ka na rakha

pahle ye shukr ki hum hadd-e-adab se na baDhe

ab ye shikwa ki sharafat ne kahin ka na rakha