dil mein kya usko mila jaan se hum dekhte hain

dil meñ kyā us ko milā jaan se ham dekhte haiñ

balki jaañ hai vahī jab dhyān se ham dekhte haiñ

chupke baiThe hue hairān se ham dekhte haiñ

tum to dekho tumheñ kis shaan se ham dekhte haiñ

dil nikal jaatā hai be-sāḳhta us dam apnā

dar meñ jis dam tujhe dālān se ham dekhte haiñ

kahte haiñ ek tumhīñ to nahīñ ham par marte

saikḌoñ jaate hue jaan se ham dekhte haiñ

vaañ se māyūs chale to haiñ na pūchho phir kuchh

pīchhe phir phir ke kis armān se ham dekhte haiñ

kyā gila aap kā jo ham ko dikhā.e qismat

aaj kuchh aur hī sāmān se ham dekhte haiñ

kuchh rukā sā jo unheñ dekhte haiñ mahfil meñ

muñh ko ek ek ke hairān se ham dekhte haiñ

allāh allāh re ai but tirī afzā.ish-e-husn

tujh ko har lahza na.ī aan se ham dekhte haiñ

haa.e qismat ki adū kahne ko apnā matlab

muñh lagāte haiñ tire kaan se, ham dekhte haiñ

kabhī jaane kā irāda jo vo karte haiñ 'nizām'

haa.e us vaqt kis armān se ham dekhte haiñ

dil mein kya us ko mila jaan se hum dekhte hain

balki jaan hai wahi jab dhyan se hum dekhte hain

chupke baiThe hue hairan se hum dekhte hain

tum to dekho tumhein kis shan se hum dekhte hain

dil nikal jata hai be-saKHta us dam apna

dar mein jis dam tujhe dalan se hum dekhte hain

kahte hain ek tumhin to nahin hum par marte

saikDon jate hue jaan se hum dekhte hain

wan se mayus chale to hain na puchho phir kuchh

pichhe phir phir ke kis arman se hum dekhte hain

kya gila aap ka jo hum ko dikhae qismat

aaj kuchh aur hi saman se hum dekhte hain

kuchh ruka sa jo unhen dekhte hain mahfil mein

munh ko ek ek ke hairan se hum dekhte hain

allah allah re ai but teri afzaish-e-husn

tujh ko har lahza nai aan se hum dekhte hain

hae qismat ki adu kahne ko apna matlab

munh lagate hain tere kan se, hum dekhte hain

kabhi jaane ka irada jo wo karte hain 'nizam'

hae us waqt kis arman se hum dekhte hain