dil mein le ke kashish bandagi ki ishq ko aazma kar to dekho

dil meñ le ke kashish bandagī kī ishq ko aazmā kar to dekho

āstāñ par kabhī us sanam ke apne sajde luTā kar to dekho

hogā har ik maqbūl sajda arsh kā nuur hogā jabīñ par

āshiqo kūcha-e-dil-rubā meñ apne sar ko jhukā kar to dekho

Duub jā.egī ḳhud mast ho kar be-ḳhudī jalva-e-ma.arifat meñ

jān-e-jānāñ sharāb-e-mohabbat mai-kashoñ ko pilā kar to dekho

hai tumhārī talab mere dil meñ naam hai mere lab par tumhārā

zarra zarra hai mushtāq jalva merī ḳhalvat meñ aa kar to dekho

duur ho ga.ī muqaddar kī zulmat jagmagā.egā ā.īna dil kā

tum ko duniyā meñ jannat milegī un kī mahfil meñ jā kar to dekho

aisā badlegā hastī kā aalam ishq ḳhud hogā husn-e-mujassam

ai 'fanā' raas aa jā.eñge ġham un se dil ko lagā kar to dekho

dil mein le ke kashish bandagi ki ishq ko aazma kar to dekho

aastan par kabhi us sanam ke apne sajde luTa kar to dekho

hoga har ek maqbul sajda arsh ka nur hoga jabin par

aashiqo kucha-e-dil-ruba mein apne sar ko jhuka kar to dekho

Dub jaegi KHud mast ho kar be-KHudi jalwa-e-marifat mein

jaan-e-jaanan sharab-e-mohabbat mai-kashon ko pila kar to dekho

hai tumhaari talab mere dil mein nam hai mere lab par tumhaara

zarra zarra hai mushtaq jalwa meri KHalwat mein aa kar to dekho

dur ho gai muqaddar ki zulmat jagmagaega aaina dil ka

tum ko duniya mein jannat milegi un ki mahfil mein ja kar to dekho

aisa badlega hasti ka aalam ishq KHud hoga husn-e-mujassam

ai 'fana' ras aa jaenge gham un se dil ko laga kar to dekho