dil mera TuTa to usko kuchh malal aa hi gaya

dil mirā TuuTā to us ko kuchh malāl aa hī gayā

apne bachpan ke khilaune kā ḳhayāl aa hī gayā

hashr meñ mazlūm sab chup rah ga.e muñh dekh kar

āḳhir is zālim ke kaam us kā jamāl aa hī gayā

hañs ke bolā jab phañsā bāloñ meñ ḳhūñ-ālūda dil

jaal phailāyā thā maiñ ne us meñ laal aa hī gayā

chhup ke gar māh-e-siyām aatā to mai kyuuñ chhūTtī

kyā karūñ maiñ sāmne mere hilāl aa hī gayā

dil thā us kā lekin ab ham mar ke deñge huur ko

vo pashemāñ hai ki vaqt-e-intiqāl aa hī gayā

kaañp uThe ġhusse se vo sun kar mirī fariyād ko

naġhma aisā thā ki āḳhir un ko haal aa hī gayā

merī nazroñ se koī ai 'shauq' sīkhe jazb-e-ishq

ban ke til āñkhoñ meñ us ke ruḳh kā ḳhaal aa hī gayā

dil mera TuTa to us ko kuchh malal aa hi gaya

apne bachpan ke khilaune ka KHayal aa hi gaya

hashr mein mazlum sab chup rah gae munh dekh kar

aaKHir is zalim ke kaam us ka jamal aa hi gaya

hans ke bola jab phansa baalon mein KHun-aluda dil

jal phailaya tha main ne us mein lal aa hi gaya

chhup ke gar mah-e-siyam aata to mai kyun chhuTti

kya karun main samne mere hilal aa hi gaya

dil tha us ka lekin ab hum mar ke denge hur ko

wo pasheman hai ki waqt-e-intiqal aa hi gaya

kanp uThe ghusse se wo sun kar meri fariyaad ko

naghma aisa tha ki aaKHir un ko haal aa hi gaya

meri nazron se koi ai 'shauq' sikhe jazb-e-ishq

ban ke til aankhon mein us ke ruKH ka KHal aa hi gaya