din ki aahen na gain raat ke nale na gae

din kī aaheñ na ga.iiñ raat ke naale na ga.e

mere dil-soz mire chāhne vaale na ga.e

apne māthe kī shikan tum se miTā.ī na ga.ī

apnī taqdīr ke bal ham se nikāle na ga.e

tazkira soz-e-mohabbat kā kiyā thā ik baar

tā-dam-e-marg zabāñ se mirī chhāle na ga.e

sham.a-rū ho ke faqat tum ne jalānā sīkhā

mere ġham meñ kabhī do ashk nikāle na ga.e

aaj tak saath haiñ sarkār-e-junūñ ke tohfe

sar kā chakkar na gayā paañv ke chhāle na ga.e

vo bhalā pech nikāleñge mirī qismat ke

apne bāloñ ke to bal un se nikāle na ga.e

koī shab aisī na guzrī ki banā kar gesū

saikḌoñ bal mirī taqdīr meñ Daale na ga.e

ham-safar aise vafādār kahāñ milte haiñ

tere vahshī ke qadam chhoḌ ke chhāle na ga.e

apnā dīvān muraqqa.a hai hasīnoñ kā 'jalīl'

nukta-chīñ thak ga.e kuchh aib nikāle na ga.e

din ki aahen na gain raat ke nale na gae

mere dil-soz mere chahne wale na gae

apne mathe ki shikan tum se miTai na gai

apni taqdir ke bal hum se nikale na gae

tazkira soz-e-mohabbat ka kiya tha ek bar

ta-dam-e-marg zaban se meri chhaale na gae

shama-ru ho ke faqat tum ne jalana sikha

mere gham mein kabhi do ashk nikale na gae

aaj tak sath hain sarkar-e-junun ke tohfe

sar ka chakkar na gaya panw ke chhaale na gae

wo bhala pech nikalenge meri qismat ke

apne baalon ke to bal un se nikale na gae

koi shab aisi na guzri ki bana kar gesu

saikDon bal meri taqdir mein Dale na gae

ham-safar aise wafadar kahan milte hain

tere wahshi ke qadam chhoD ke chhaale na gae

apna diwan muraqqa hai hasinon ka 'jalil'

nukta-chin thak gae kuchh aib nikale na gae