faeda kya hai hamein aur KHasara kya hai

fā.eda kyā hai hameñ aur ḳhasāra kyā hai

jo bhī hai aap kā sab kuchh hai hamārā kyā hai

ham ne kuchh aisī banā rakkhī hai hālat apnī

pūchhtā koī nahīñ haal tumhārā kyā hai

kuchh nahīñ dekhte kuchh bhī ho tire dīvāne

dekhte haiñ tirī jānib se ishāra kyā hai

duur se jo nazar aatā hai sitāre jaisā

ashk-e-mahtāb hai yā koī sharāra kyā hai

jism par vaar kiyā aur use Dher kiyā

ham ko maarā hai qazā ne vale maarā kyā hai

ḳhatm ho jā.egā jab khel to khul jā.egā

koī jiitā hai to kyā haarā to haarā kyā hai

Dūbne vaale ko tinke kā sahārā hai bahut

Dūbne vaale ko tinke kā sahārā kyā hai

mar ga.e hote to yaad aate tumheñ bhī 'ajmal'

jī rahe haiñ to qusūr is meñ hamārā kyā hai

faeda kya hai hamein aur KHasara kya hai

jo bhi hai aap ka sab kuchh hai hamara kya hai

hum ne kuchh aisi bana rakkhi hai haalat apni

puchhta koi nahin haal tumhaara kya hai

kuchh nahin dekhte kuchh bhi ho tere diwane

dekhte hain teri jaanib se ishaara kya hai

dur se jo nazar aata hai sitare jaisa

ashk-e-mahtab hai ya koi sharara kya hai

jism par war kiya aur use Dher kiya

hum ko mara hai qaza ne wale mara kya hai

KHatm ho jaega jab khel to khul jaega

koi jita hai to kya haara to haara kya hai

Dubne wale ko tinke ka sahaara hai bahut

Dubne wale ko tinke ka sahaara kya hai

mar gae hote to yaad aate tumhein bhi 'ajmal'

ji rahe hain to qusur is mein hamara kya hai