falak ke hathon jidhar munh uThae jata hun

falak ke hāthoñ jidhar muñh uThā.e jaatā huuñ

udhar se juuñ gul-e-bāzī tapāñcha khātā huuñ

kabhī hai āñkhoñ meñ zar diida pe nigah un kī

ki maiñ har ek se aañkh apnī ab churātā huuñ

havā ke ghoḌe pe jab vo savār hote haiñ

to pā ke vaqt maiñ kyā kyā maze uḌātā huuñ

ḳhilāfī un ke vo āñkheñ jo yaad aatī haiñ

to apnī āñkhoñ ko ro ro ke maiñ sujātā huuñ

balā se gar nahīñ milte vo mujh se par 'mārūf'

unhoñ kā shahr maiñ āshiq to maiñ kahātā huuñ

falak ke hathon jidhar munh uThae jata hun

udhar se jun gul-e-bazi tapancha khata hun

kabhi hai aankhon mein zar dida pe nigah un ki

ki main har ek se aankh apni ab churaata hun

hawa ke ghoDe pe jab wo sawar hote hain

to pa ke waqt main kya kya maze uData hun

KHilafi un ke wo aankhen jo yaad aati hain

to apni aankhon ko ro ro ke main sujata hun

bala se gar nahin milte wo mujh se par 'maruf'

unhon ka shahr main aashiq to main kahata hun