faujiyon ke sar to dushman ke sipahi le gae

faujiyoñ ke sar to dushman ke sipāhī le ga.e

haath jo qīmat lagī zill-e-ilāhī le ga.e

jurm merā sirf itnā thā ki maiñ mujrim na thā

qaid tak mujh ko subūt-e-be-gunāhī le ga.e

ab vahī duniyā meñ Thahre amn-e-ālam ke amiiñ

jo amaañ kī jā tak asbāb-e-tabāhī le ga.e

shikva-e-jalva-numā.ī sirf un ke lab pe hai

jo tirī mahfil meñ apnī kam-nigāhī le ga.e

tum haram se le ga.e shab kī siyāhī aur ham

mai-kade se bhī ziyā-e-sub.h-gāhī le ga.e

maiñ idhar 'aḳhlāq' kī taqsīm meñ masrūf thā

log udhar merī adā-e-kaj-kulāhī le ga.e

faujiyon ke sar to dushman ke sipahi le gae

hath jo qimat lagi zill-e-ilahi le gae

jurm mera sirf itna tha ki main mujrim na tha

qaid tak mujh ko subut-e-be-gunahi le gae

ab wahi duniya mein Thahre amn-e-alam ke amin

jo aman ki ja tak asbab-e-tabahi le gae

shikwa-e-jalwa-numai sirf un ke lab pe hai

jo teri mahfil mein apni kam-nigahi le gae

tum haram se le gae shab ki siyahi aur hum

mai-kade se bhi ziya-e-subh-gahi le gae

main idhar 'aKHlaq' ki taqsim mein masruf tha

log udhar meri ada-e-kaj-kulahi le gae