fida allah ki KHilqat pe jis ka jism o jaan hoga

fidā allāh kī ḳhilqat pe jis kā jism o jaañ hogā

vahī afsāna-e-hastī kā mīr-e-dāstāñ hogā

yaqīñ jis kā kalām-e-quds ajr-ul-mohsinīñ par ho

niko-kārī kā us kī qaa.il ik din kul jahāñ hogā

hayāt-e-jāvedānī pā.egā vo 'ishq-e-sādiq meñ

jo 'anqā kī tarah mā'dūm hogā be-nishāñ hogā

safar rāh-e-mohabbat kā chahal-qadmī samajhte ho

abhī dekhoge tum ik ik qadam par haft-ḳhvāñ hogā

hameñ gulzār-e-jannat hai azīzo bāġh-e-dil apnā

samajhte ho ki jāñ-parvar hai sehn-e-gulsitāñ hogā

jo īsār aur hamdardī shi'ār apnā banā loge

to kāñTā bhī tumheñ rashk-e-gul-e-bāġh-e-jināñ hogā

ye qissa sham' o parvāne kā bas mā-vashā tak hai

vo ho jā.egā bazm-ārā to phir koī kahāñ hogā

adā-e-farz bar-haq par khapā do dosto jaañ tak

ye vo saudā hai āḳhir ko nahīñ jis meñ ziyāñ hogā

azal se vā.izo ke qaul duniyā suntī aa.ī hai

'amal kā vaqt bhī koī kabhī ai mehrbāñ hogā

taġhāful aur sitam ke badle hai andāz dildārī

sambhal ai shauq-e-be-pāyāñ tirā ab imtihāñ hogā

tahī-dastān-e-qismat ko to dam lenā qayāmat hai

yahāñ kuchh ho gayā insāf-e-āshiq jo vahāñ hogā

na samjho khel is ko bazm 'kaifī' meñ vo jaadū hai

yahāñ gar zāhid-e-ḳhushk aa.egā pīr-e-muġhāñ hogā

fida allah ki KHilqat pe jis ka jism o jaan hoga

wahi afsana-e-hasti ka mir-e-dastan hoga

yaqin jis ka kalam-e-quds ajr-ul-mohsinin par ho

niko-kari ka us ki qail ek din kul jahan hoga

hayat-e-jawedani paega wo 'ishq-e-sadiq mein

jo 'anqa ki tarah ma'dum hoga be-nishan hoga

safar rah-e-mohabbat ka chahal-qadmi samajhte ho

abhi dekhoge tum ek ek qadam par haft-KHwan hoga

hamein gulzar-e-jannat hai azizo bagh-e-dil apna

samajhte ho ki jaan-parwar hai sehn-e-gulsitan hoga

jo isar aur hamdardi shi'ar apna bana loge

to kanTa bhi tumhein rashk-e-gul-e-bagh-e-jinan hoga

ye qissa sham' o parwane ka bas ma-washa tak hai

wo ho jaega bazm-ara to phir koi kahan hoga

ada-e-farz bar-haq par khapa do dosto jaan tak

ye wo sauda hai aaKHir ko nahin jis mein ziyan hoga

azal se waizo ke qaul duniya sunti aai hai

'amal ka waqt bhi koi kabhi ai mehrban hoga

taghaful aur sitam ke badle hai andaz dildari

sambhal ai shauq-e-be-payan tera ab imtihan hoga

tahi-dastan-e-qismat ko to dam lena qayamat hai

yahan kuchh ho gaya insaf-e-ashiq jo wahan hoga

na samjho khel is ko bazm 'kaifi' mein wo jadu hai

yahan gar zahid-e-KHushk aaega pir-e-mughan hoga