gham se kahin najat mile chain paen hum

ġham se kahīñ najāt mile chain paa.eñ ham

dil ḳhuun meñ nahā.e to gañgā nahā.eñ ham

jannat meñ jaa.eñ ham ki jahannam meñ jaa.eñ ham

mil jaa.e to kahīñ na kahīñ tujh ko paa.eñ ham

jauf-e-falak meñ ḳhaak bhī lazzat nahīñ rahī

jī chāhtā hai terī jafā.eñ uThā.eñ ham

Dar hai na bhuul jaa.e vo saffāk roz-e-hashr

duniyā meñ likhte jaate haiñ apnī ḳhatā.eñ ham

mumkin hai ye ki va.ade par apne vo aa bhī jaa.e

mushkil ye hai ki aap meñ us vaqt aa.eñ ham

nārāz ho ḳhudā to kareñ bandagī se ḳhush

māshūq ruuTh jaa.e to kyūñkar manā.eñ ham

sar dostoñ kā kaaT ke rakhte haiñ sāmne

ġhairoñ se pūchhte haiñ qasam kis kī khā.eñ ham

kitnā tirā mizāj ḳhushāmad-pasand hai

kab tak kareñ ḳhudā ke liye iltijā.eñ ham

lālach abas hai dil kā tumheñ vaqt-e-vāpsīñ

ye maal vo nahīñ ki jise chhoḌ jaa.eñ ham

sauñpā tumheñ ḳhudā ko chale ham to nā-murād

kuchh paḌh ke baḳhshnā jo kabhī yaad aa.eñ ham

soz-e-darūñ se apne sharar ban ga.e haiñ ashk

kyuuñ āh-e-sard ko na patiñge lagā.eñ ham

ye jaan tum na loge agar aap jā.egī

us bevafā kī ḳhair kahāñ tak manā.eñ ham

ham-sā.e jāgte rahe nāloñ se raat bhar

so.e hue nasīb ko kyūñkar jagā.eñ ham

jalva dikhā rahā hai vo ā.īna-e-jamāl

aatī hai ham ko sharm ki kyā muñh dikhā.eñ ham

maano kahā jafā na karo tum vafā ke ba.ad

aisā na ho ki pher leñ ulTī duā.eñ ham

dushman se milte julte haiñ ḳhātir se dostī

kyā fā.eda jo dost ko dushman banā.eñ ham

tū bhūlne kī chiiz nahīñ ḳhuub yaad rakh

ai 'dāġh' kis tarah tujhe dil se bhulā.eñ ham

gham se kahin najat mile chain paen hum

dil KHun mein nahae to ganga nahaen hum

jannat mein jaen hum ki jahannam mein jaen hum

mil jae to kahin na kahin tujh ko paen hum

jauf-e-falak mein KHak bhi lazzat nahin rahi

ji chahta hai teri jafaen uThaen hum

Dar hai na bhul jae wo saffak roz-e-hashr

duniya mein likhte jate hain apni KHataen hum

mumkin hai ye ki wade par apne wo aa bhi jae

mushkil ye hai ki aap mein us waqt aaen hum

naraaz ho KHuda to karen bandagi se KHush

mashuq ruTh jae to kyunkar manaen hum

sar doston ka kaT ke rakhte hain samne

ghairon se puchhte hain qasam kis ki khaen hum

kitna tera mizaj KHushamad-pasand hai

kab tak karen KHuda ke liye iltijaen hum

lalach abas hai dil ka tumhein waqt-e-wapsin

ye mal wo nahin ki jise chhoD jaen hum

saunpa tumhein KHuda ko chale hum to na-murad

kuchh paDh ke baKHshna jo kabhi yaad aaen hum

soz-e-darun se apne sharar ban gae hain ashk

kyun aah-e-sard ko na patinge lagaen hum

ye jaan tum na loge agar aap jaegi

us bewafa ki KHair kahan tak manaen hum

ham-sae jagte rahe nalon se raat bhar

soe hue nasib ko kyunkar jagaen hum

jalwa dikha raha hai wo aaina-e-jamal

aati hai hum ko sharm ki kya munh dikhaen hum

mano kaha jafa na karo tum wafa ke baad

aisa na ho ki pher len ulTi duaen hum

dushman se milte julte hain KHatir se dosti

kya faeda jo dost ko dushman banaen hum

tu bhulne ki chiz nahin KHub yaad rakh

ai 'dagh' kis tarah tujhe dil se bhulaen hum