go teri zulfon ka zindani hun main

go tirī zulfoñ kā zindānī huuñ maiñ

bhuul mat jaanā ki sailānī huuñ maiñ

zindagī kī qaid koī qaid hai

sūkhte tālāb kā paanī huuñ maiñ

chāñdnī rātoñ meñ yāroñ ke baġhair

chāñdnī rātoñ kī vīrānī huuñ maiñ

jis qadar maujūd huuñ mafqūd huuñ

jis qadar ġhā.eb huuñ lāfānī huuñ maiñ

mujh ko tanhā.ī meñ sunñā baiTh kar

mutrib-e-lamhāt-e-vajdānī huuñ maiñ

jis qadar kartā huuñ andesha 'adam'

us qadar tasvīr-e-hairānī huuñ maiñ

aql se kyā kaam mujh nāchīz kā

ek ma.amūlī sī nādānī huuñ maiñ

huuñ agar to huuñ bhī kyā is ke sivā

qīmtī virse kī arzānī huuñ maiñ

dil kī dhaḌkan baḌhtī jaatī hai 'adam'

kis hasīñ ke zer-e-nigrānī huuñ maiñ

go teri zulfon ka zindani hun main

bhul mat jaana ki sailani hun main

zindagi ki qaid koi qaid hai

sukhte talab ka pani hun main

chandni raaton mein yaron ke baghair

chandni raaton ki virani hun main

jis qadar maujud hun mafqud hun

jis qadar ghaeb hun lafani hun main

mujh ko tanhai mein sunna baiTh kar

mutrib-e-lamhat-e-wajdani hun main

jis qadar karta hun andesha 'adam'

us qadar taswir-e-hairani hun main

aql se kya kaam mujh nachiz ka

ek mamuli si nadani hun main

hun agar to hun bhi kya is ke siwa

qimti wirse ki arzani hun main

dil ki dhaDkan baDhti jati hai 'adam'

kis hasin ke zer-e-nigrani hun main