hadis-e-jam chale qissa-e-subu nikle

hadīs-e-jām chale qissa-e-subū nikle

kisī bhī tarah sahī terī guftugū nikle

maiñ tesha-zan huuñ tire vāste yahī bas hai

ye aarzū hī kise hai ki aarzū nikle

na jaane kyoñ mirā lahja badalne lagtā hai

jo dostoñ meñ kabhī terī guftugū nikle

diloñ kī baat bhī niklī nasīm-e-āvāra

hamāre ishq ke qisse bhī kū-ba-kū nikle

ye jānte haiñ ki tū shahr meñ nahīñ hai magar

hai phir bhī aas kisī moḌ par se tū nikle

dil-e-gudāz kā kartā huuñ ehtirām itnā

maiñ chuum letā huuñ jis aañkh se lahū nikle

ḳhudā ke fazl se maiñ kam hunar na thā 'afsar'

sitam to ye hai ki ahbāb aib-jū nikle

hadis-e-jam chale qissa-e-subu nikle

kisi bhi tarah sahi teri guftugu nikle

main tesha-zan hun tere waste yahi bas hai

ye aarzu hi kise hai ki aarzu nikle

na jaane kyon mera lahja badalne lagta hai

jo doston mein kabhi teri guftugu nikle

dilon ki baat bhi nikli nasim-e-awara

hamare ishq ke qisse bhi ku-ba-ku nikle

ye jaante hain ki tu shahr mein nahin hai magar

hai phir bhi aas kisi moD par se tu nikle

dil-e-gudaz ka karta hun ehtiram itna

main chum leta hun jis aankh se lahu nikle

KHuda ke fazl se main kam hunar na tha 'afsar'

sitam to ye hai ki ahbab aib-ju nikle