hain aise bad-hawas hujum-e-bala se hum

haiñ aise bad-havās hujūm-e-balā se ham

apnā samajh ke milte haiñ har āshnā se ham

tūfān se ulajh ga.e le kar ḳhudā kā naam

āḳhir najāt pā hī ga.e nāḳhudā se ham

pahlā sā vo junūn-e-mohabbat nahīñ rahā

kuchh kuchh sambhal ga.e haiñ tumhārī duā se ham

yuuñ mutma.in se aa.e haiñ khā kar jigar pe choT

jaise vahāñ ga.e the isī mudda.ā se ham

aane do iltifāt meñ kuchh aur bhī kamī

mānūs ho rahe haiñ tumhārī jafā se ham

ḳhū-e-vafā milī dil-e-dard-āshnā milā

kyā rah gayā hai aur jo nā māñgeñ ḳhudā se ham

aadat sī ho ga.ī hai shikāyāt kī hameñ

bezār to nahīñ haiñ tumhārī jafā se ham

pā-e-talab bhī tez thā manzil bhī thī qarīb

lekin najāt pā na sake rahnumā se ham

duniyā se kuchh lagāo na uqbā kī aarzū

tañg aa ga.e haiñ is dil-e-be-mudda.ā se ham

hote nashāt-e-ishq se bhī faizyāb 'arsh'

majbūr haiñ magar dil-e-ġham-āshnā se ham

hain aise bad-hawas hujum-e-bala se hum

apna samajh ke milte hain har aashna se hum

tufan se ulajh gae le kar KHuda ka nam

aaKHir najat pa hi gae naKHuda se hum

pahla sa wo junun-e-mohabbat nahin raha

kuchh kuchh sambhal gae hain tumhaari dua se hum

yun mutmain se aae hain kha kar jigar pe choT

jaise wahan gae the isi muddaa se hum

aane do iltifat mein kuchh aur bhi kami

manus ho rahe hain tumhaari jafa se hum

KHu-e-wafa mili dil-e-dard-ashna mila

kya rah gaya hai aur jo na mangen KHuda se hum

aadat si ho gai hai shikayat ki hamein

bezar to nahin hain tumhaari jafa se hum

pa-e-talab bhi tez tha manzil bhi thi qarib

lekin najat pa na sake rahnuma se hum

duniya se kuchh lagao na uqba ki aarzu

tang aa gae hain is dil-e-be-muddaa se hum

hote nashat-e-ishq se bhi faizyab 'arsh'

majbur hain magar dil-e-gham-ashna se hum