har ek kamal ko dekha jo humne ru ba-zawal

har ik kamāl ko dekhā jo ham ne rū ba-zavāl

sisak ke rah ga.ī siine meñ ārzū-e-kamāl

ham apnī Dūbtī qadroñ ke saath Duub ga.e

milegī ab to kitāboñ meñ bas hamārī misāl

hue anā ke dikhāve se log sar afrāz

anā ne sar ko uThā kar kiyā hameñ pāmāl

zarā sī umr meñ kis kis kā hal talāsh kareñ

khaḌe haiñ rāsta roke hue hazār savāl

mire ḳhulūs kā yāroñ ne aasrā le kar

kiyā hai ḳhuub mirī dostī kā istehsāl

bujhā bujhā sā yahī dil hai is shabāb kī raakh

ragoñ meñ dauḌ rahī thī jo ātish-e-sayyāl

mile vo lamha jise apnā kah sakeñ 'kaifī'

guzar rahe haiñ isī justujū meñ māh-o-sāl

har ek kamal ko dekha jo hum ne ru ba-zawal

sisak ke rah gai sine mein aarzu-e-kamal

hum apni Dubti qadron ke sath Dub gae

milegi ab to kitabon mein bas hamari misal

hue ana ke dikhawe se log sar afraaz

ana ne sar ko uTha kar kiya hamein pamal

zara si umr mein kis kis ka hal talash karen

khaDe hain rasta roke hue hazar sawal

mere KHulus ka yaron ne aasra le kar

kiya hai KHub meri dosti ka istehsal

bujha bujha sa yahi dil hai is shabab ki rakh

ragon mein dauD rahi thi jo aatish-e-sayyal

mile wo lamha jise apna kah saken 'kaifi'

guzar rahe hain isi justuju mein mah-o-sal